Durante e dianan aki parlamentarionan di POR ta hopi druk cu tur e documentacion relaciona cu presupuesto 2018 cu lo wordo trata dentro di poco durante reunion publico den sala di Parlamento.
Parlamentario Alan Howell a constata durante cu e tabata pasando den e cientos di paginanan cu ta iclui tambe presupuestonan 2016 y 2017, San Nicolas a bolbe keda atras y “nos hendenan a wordo engaña un biaha mas”. E ta bisa esaki pasobra den e presupuesto no tabatin ningun edificio di MFA nobo pa San Nicolas den planning, manera cu gobierno anterior a bisa na varios ocasion. Es decir, gobierno di AVP a percura pa traha edificionan di MFA na Noord, Paradera, Santa Cruz y Savaneta, pero nunca a haci algo pa traha uno pa pueblo di san Nicolas.
Gobierno anterior a traha e edificionan aki pa gana voto, pero atrobe a tuma ‘nos hendenan di pariba haci y laga nos sin nada. Debi cu nan tabata sigur di nan mes y confia cu e hendenan di San Nicolas ta keto y lo vota toch pa AVP no a traha un na San Nicolas. Cu e pretexto cu di San Nicolas lo bin ultimo”, Alan Howell a duna di conoce. Pero awo e puyitonan a bin afo y a keda demostra cu e MFA pa San Nicolas tabata un gañamento. Mirando e situacion precario di nos finansas publico, tabata practicamente imposibel pa gobierno actual hinca e proyecto di MFA San Nicolas den presupuesto 2018.
Howell y fraccion POR lo manda un mocion aden exigiendo un MFA tambe pa San Nicolas mas lihe cu ta posibel. El a finalisa bisando cu den un combersacion cu Gabinete Wever-Croes, gobierno tambe ta di acuerdo cu San Nicolas merece su fair share y el lo ta vigilante pa esaki sosode tambe.