Bureau Rampenbestrijding Aruba kier a pone e publico na altura cu riba e fecha diaranson 18 di april 2018 ta tuma luga un training multidisciplinario den e cayanan di San Nicolas. For di 8’or di mainta te cu 11or di mainta lo tin algun di e cayanan di San Nicolas cu lo NO tin acceso pa trafico. Esaki ta pa motibo di un training cu lo ta tumando luga entre diferente organisacion, dienst y instancianan di Aruba.
Cayanan cu lo wordo uza pa e training aki
Lagoweg – Caya Captain R. Rodger – Theaterstraat – Nuyenstraat – Helfrichtstraat – Caya Principal di San Nicolas
Cooperacion
Ta pidi e cooperacion di e publico y comerciantenan pa 3 ora di training aki. Durante e 3 ora ey lo no ta bay di acceso facil pa e cayanan menciona. Tambe lo tin aglomeracion di grupo di personanan cu lo ta forma parti di e training aki. E acceso na e casnan, negoshinan den e cayanan aki lo no ta bay ta facil manera custumber. Pa e motibo aki haci e peticion pa duna e cooperacion necesario pa asina e training aki por wordo realisa sin ningun contra tiempo.
Keda informa; ki ora ta cuminsa, su desaroyo y tambe e final di e training
Tur persona cu tin e app riba na telefon di ALERT FM lo ricibi informacion regardando e training. Lo ricibi un mensahe ora e training cuminsa. Durante e 3 ora di e training mes lo ricibi 1 mensahe cada 1 ora con e training ta desaroyando y na final lo ricibi un mensahe caminda cu ta informa cu e training a termina.
Esunnan cu no tin e app riba na telefon ainda nan por download esaki, ora di download e app y ta yega na e parti cu e ta pidi e code, bo tin cu yena 99888 (pa Aruba).
Por haya tur e instruccionnan tocante e app aki riba e facebook di Bureau Rampenbestrijding Aruba.
