Home Sports Cu ‘hattrick’ di Yenhifer Huntington La Fama ta logra triunfo comodo...

Cu ‘hattrick’ di Yenhifer Huntington La Fama ta logra triunfo comodo riba Deportivo Nacional den futbol femenino

Campeonato division femenino a sigui su curso caminda e ekipo di Savaneta, La Fama a midi forsa contra di e hoben ekipo di Deportivo Nacional.
Un partido cu La Fama a domina y ta logra un triunfo comodo cu anotacion di 8-1 pa asina sigui riba caminda pa sigura su clasificacion den e prome cuater ekiponan di e division di femenino cu ta duna derecho na participa den e serie di play off semi final.
C’un ‘hattrick’ auentico di e delantero Yenhifer Huntington den di dos tempo, e ekipo di La Fama a logra sigura e triunfo importante aki cu ta duna ekipo un total di 22 punto faltando ainda tres compromiso pa termina e campeonato regular.
Deportivo Nacional tin un ekipo hopi hoben cu a cuminsa e wega cu gran entusiasmo pero tabata un gol di e maximo goleador di campeonato, Shadira Croes e ekipo di Laa Fama ta logra tuma bentaha di 1-0 na di 13 minuut di wega.
Sinembargo e bentaha no a dura mucho ya cu dos minuut despues Deportivo Nacional a probecha di un mal entendimento den defensa di La Fama y ta logra empata e partido na 1-1.
La Fama ta reacciona mesora y ta presiona e defensa di Nacional y durante di un hugada portero di Nacional mes ta pusha e bala den net pa asina e ekipo di Savaneta bolbe tuma bentaha di 2-1.
Un bentaha cu e ekipo lo no perde mas pa resto di wega y den e prome tempo ta logra di anota dos gol mas pa medio di Lissandra Fradl y Jesika Arias pa asina bay sosega cu bentaha comodo di 4-1.

Den di dos tempo La Fama a sigui cu su dominio den e wega y apesar di varios bon combinacion for di medio campo, e ekipo no tabata efectivo na momento di defini e parti final.
Sinembargo e ekipo di Savaneta ta bin aumenta su bentaha cu tres gol di e delantero Yenhifer Huntington, caminda uno tabata un tiro indirecto cobra hunto cu Lilliane Saladin, caminda e tiro ta dal den tubo y bay den gol y cu a bin completa e ‘hattrick’ d Huntington.
La Fama no tabata efectivo cu su tironan riba gol y na di 40 minuut tabata e medio campista Valeria Cruz kende ta los un tiro crusa cu portero di Nacional no por a evita di bay gol y asina e score final a bira 8-1 pa La Fama.
E proximo compromiso di La Fama lo ta diadomingo venidero contra di Dakota cual wega lo wordo hunga den stadion Franklin Bareño na Piedra Plat.
Dakota tin un total di 13 punto y falta tres wega ainda pa hunga mientras cu Deportivo Nacional su proximo encuentro lo ta contra Riverplate dialuna venideron den stadion Guillerm Prospero Trinidad na Dakota.