Durante e rueda di prensa di AVP diamars ultimo por a scucha Richard Arends cu masha yoramento riba e presupuesto cu Gabinete Wever Croes a entrega. Diripiente Richard Arends kier cuestiona e presupuesto y splica unda y con mester aloca cada florin di e pais aki. Richard Arends ta e mesun cabayero cu a traha pa FESCA y na 2009 a presenta no un, pero dos presupuesto alternativo pa pais Aruba. Resultado di Richard Arends hunto cu Mike Eman nan fantasia a costa e puebo aki BIYONES mientras a hipotheca nos futuro generacion.
Deficit di 9.3% di GDP
Tur e presupuestonan artificial cu AVP a traha ultimo añanan a yega te na un KB. Presupuesto 2014 cu un deficit di 9.3% di GDP cu ta igual na un buraco di mas di 400 MIYON florin y cu a bay den historia pa e masacre mas grandi di pais Aruba. Mike Eman bou palo ta yora mientras Aruba a wordo claba cu un CAFT kibrando parti di nos Status Aparte. Na 2008 debe nacional tabata 41.7% di GDP y na 2018 esaki a alcansa 93% di GDP. Pues di cada florin cu drenta caha di gobierno 93 cen ta comprometi pa paga debe mientras gobierno ta resta 7 cen so pa maneha un pais.
Redoblacion di interes
Tabata paga 100 MIYON na interes y den 8 aña di Mike y Richard esaki a alcansa 216 MIYON florin pa aña na interes solamente. Crueldad ta poco pa locual e hendenan aki a haci cu e pais aki. Awe Richard Arends kier splica Coalicion con pa atende cu begroting di e pais aki. Boso no tin credibilidad mas, tampoco consenshi. Boso mester ta mas sincero cu e pueblo aki. Pues sinta den banki trankilo y duna e Coalicion e oportunidad pa traha y saca Aruba di e desaster financiero cu boso a orchestra. Poco poco pero sigur lo logra saca Aruba for di e abismo aki. Retonan ta grandi pero e amor y pasion pa trece felicidad bek pa henter e pueblo ta nos motto y lo percura pa cumpli cu ne.