Minister di Turismo, Salubridad Publico y Deporte, Sr. Dangui Oduber a tene un reunion sumamente positivo cu TNO na unda e la ser presenta e asina llama ‘scope of work’ di parti di TNO con ta nan bai conduci nan investigacion na hospital encuanto e calidad di aire den e edificio di hospital.
E accion den immediato aki di parti di e mandatario di Salubridad Publico ta pa motibo cu algun siman atras tawata tin diferente incidentenan cu a tuma lugar na hospital caminda diferente personal laborando na hospital entre otro na operatiekamer, radiologia y e botica a bai cas malo pa motibo di holornan toxico den e aire den e edificio di hospital. E titular actual encarga cu Salubridad Publico tin e siguridad di e trahadornan na hospital central. E mandatario ta kere cu si bo trahadornan ta contento nan lo provee un miho calidad di cuido na nos patientnan y como tal nan mester wordo protehi tambe durante cu nan ta laborando diario na hospital.
Minister Dangui Oduber ta compromete su mes cu e trahadornan di hospital cu e lo hasi su maximo esfuerso pa saca afo kiko ta ocasionando e holornan toxico aki y unabes esaki ta conoci e lo sigura e trahadornan cu e lo instrui gerencia di hospital pa soluciona esaki pa asina garantisa nan siguridad diario na pia di trabou.
