Parlamentario Endy Croes ta hopi decepciona cu e forma di proceder di Parlamentarionan di AVP. Diabierna ultimo tabata tin un reunion di Comision Central (CC) unda normalmente Parlamentarionan di tur partido ta bini hunto den sala di Parlamento den e mesun setting cu un Reunion Publico pero esaki ta wordo trata cu porta cera. Durante e tipo di reunionnan aki ta debati na un manera sano pa yega na un acuerdo pa pone fecha pa un reunion publico. Tambe ta pone un fecha unda Parlamentarionan por haci nan preguntanan por escrito. Alaves si bo no haci pregunta por escrito, bo por haci esaki durante e reunion publico.
Deadline pa aproba presupuesto 2018
Durante di e reunion di Comision Central di diabierna ultimo a trata e topico pa establece un fecha pa parlamentarionan por entrega pregunta riba Presupuesto 2018 di Pais Aruba y alaves pone un fecha pa cuminsa trata esaki den un reunion publico. Coalicion a bin cu un proposicion pa diabierna 13 di April entrega preguntanan y inicia cu e reunion publico dia 18 di April. Nos tur sa cu tin un deadline di Hulanda cual ta 30 di April cu e begroting mester ta aproba. Di acuerdo cu e Ley di LAFT en realidad e begroting 2018 mester tabata aproba caba riba ultimo dia 15 di December 2017. Ta debi na e desaster financiero cu AVP a laga atras y cu e Coalicion a hereda a bin un cambio. Momento cu AVP a bandona gobernacion 17 di November 2017 a bin sali na cla cu 2017 tin un deficit di 130 MIYON y no lo cera aña cumpliendo cu e Ley di LAFT cual mester ta un deficit di -0.5% cu ta igual na -25 Miyon. E desaster tabata mucho mas grandi y mas horibel cu por a anticipa.
Reunion a hera sali for di man
CAFT y Hulanda, comprondiendo e situacion, a bay di acuerdo mesora momento nan tambe a pone nan mes na altura di e desaster cu AVP a ocasiona y a bay over na duna e gobierno nobo tempo pa inventerisa tur cos y traha un begroting nobo y realistico cu un deadline di 30 di April 2018. Sinembargo durante reunion di Comision Central cos a hera bay for di control. Marlon Sneek na un manera sarcastico y cu un arogancia tabata exigi pa wanta e presupuesto di Pais Aruba pa 3 siman como cu e mester bay Parlatino medio April. Esaki a ricibi apoyo total di su colega Richard Arends. Mester puntra bo mes ta con serio AVP por ta alrespecto un tema asina importante pa cu henter e pais. Fraccion di MEP mediante su lider di Fraccion Rocco Tjon a bisa AVP pa nan duna un otro fecha tentativo pero den cuadro di e realidad pa nos trata y aproba e begroting prome cu 30 di April.
Interes personal di Marlon Sneek
AVP no kier a propone un fecha tampoco y ta keda insisti cu Marlon Sneek mester bay Parlatino of ta vakantie y wanta esaki por lo menos pa 3 siman. Mesora Hendrik Tevreden, Edgard Vrolijk y Endy Croes a cay aden cu tononan hopi fuerte pa pone Marlon Sneek para straight cu aki ta tratando di un interes di un Pais y ningun interes personal lo bay dilanti esaki. Vice Presidente di Parlamento, Sr Alan Howell a actua inteligentemente pa por a domina emocionnan di e diferente Parlamentarionan kendenan a mustra AVP cu nan ta den oposicion y pa nan actua conforme e regla nobo, esta “een toontje lager”. AVP a lubida tempo cu nan tabata den gobierno con nan a abusa di entre otro MEP e tempo aya dunando solamente dos dia pa studia presupuesto 2014 trapando riba tur regla di bon gobernacion y Budgetrecht. Wel Coalicion a pone e stempel den Parlamento cu cos a cambia y Bo ta Sinti E Cambio .