ORANJESTAD, Aruba – Recientemente Dr. Horacio E. Oduber Hospital y Educacion Profesional Intermedio (EPI) Sector Salubridad & Servicio a cera un acuerdo pa studiantenan di enfermeria wordo guia debidamente den practica na Hospital durante nan ultimo 2 añanan di estudio mientras nan ta ricibiendo e parti teoretico na EPI.
Hospital, EPI y Minister di Enseñansa ta contento cu e logro aki, unda cu e studiante den enfermeria por integra e parti teoretico di biaha den practica, sin e necesidad di bay studia di biaha den exterior. Hospital a cuminsa cu e proyecto aki cu Ministernan di Enseñansa anterior mr. Drs. Arthur Dowers y Michelle Hooyboer-Winklaar, di cual e actual Minister di Enseñansa, Dr. Rudy Lampe a firma e acuerdo final.
Pa Hospital e acuerdo aki ta bay crea un graduado cu ta miho ekipa pa sigui un estudio specialisa den enfermeria, asina Director encarga cu Cuido di Hospital, sr. Ezzard Cilié a duna di conoce. Aki na Aruba, EPI ta encarga cu e pari teoretico y awor cu e acuerdo aki, Hospital lo percura pa den practica entrena e studiantenan debidamente durante nan estudio. E acuerdo ta un forma hopi mas estrecho cu nan a palabra riba con nan ta bay traha hunto pa asina Hospital haya un miho calidad di studiante, cu bista pa futuro.
Sr. Cilié a duna di conoce cu ya pa hopi aña Hospital tin acuerdonan cu VuMC y Amstel Academie cu ta brinda oportunidad pa specialisa den diferente ramo den enfermeria.
Riba tereno medico Hospital no por keda atras. E realidad ta cu Hospital ta hayando hopi mas dokternan specialisa for di Hulanda. Mirando e estudio cu e dokternan ta ricibi na Hulanda ta rekeri pa Hospital mester adapta su mes, pa loke ta e educacion di su enfermeronan. E relacion estrecho cu scolnan na Hulanda ta haci cu Hospital ta bay engrandece e nivel di conocemento di su enfermeronan asina nan por traha mas estrecho cu e dokternan specialisa. E cuido medico lo tin su avance den dje.
Minister di Educacion, Ciencia y Desaroyo Sostenibel, Dr. Rudy Lampe, a duna di conoce cu e momento aki ta di satisfaccion hopi grandi pa firma e acuerdo entre Hospital y EPI p’e formacion di enfermeronan di Aruba. E ta un combinacion di practica y teoria cu na final e pashent lo beneficia hopi di e sistema aki.
EPI ta un instancia na nivel MBO cu ta forma enfermeronan y Hospital tin mester di nan pa por sigui opera y brinda cuido. E acuerdo ta formalisa e cooperacion aki. Rond mundo tin scarsedad di enfermeronan, esaki ta nifica cu Aruba no por depende di enfermeronan stranhero. Aruba mes mester produci enfermeronan y p’esey e acuerdo ta yuda suministra e demanda grandi cu tin di enfermeronan cualifica pa por sigui duna e servicio aki na Aruba.
