Minister Ruiz-Maduro durante su biahe recien pa Hulanda, a reuni cu sectretario di estado Raymond Knops. Pa e mandatario esaki tabata e reunion di mas importante y specula riba dje cu e tabata tin na Hulanda.
Den e conbersacionnan, señor Knops a trece dilanti cu e supervision di CFT manera cu nos a conoce na pais Aruba no a duna su fruto manera cu nos y Hulanda tambe a spera di dje. Cu otro palabra e supervision di CFT a faya, pasobra ta bou di nan supervision e situacion financiero di Pais Aruba a empeora. Esaki debi na e mal maneho financiero cu Gabinete Mike Eman a hiba.
Segun e mandatatario, pueblo di Aruba a kere cu CAFT lo a trece e siguransa cu cos lo bira miho sinembargo e mal maneho di Gabinete Mike Eman a hiba nos na e situacion cu awo di cada florin 93 cen ta bay pa paga e debe.
“Esaki ta sin duda un situacion hopi fastioso na unda cu Gobierno di Aruba a sali y splica pueblo cu ta yega e momento na unda cu nos mester mustra e madures politico y cu no por keda culpa tur hende pa e fayonan di solamente Mike Eman y su Gabinete cu a hiba un maneho financiero desastroso y hinca nos den e situacion financiero caotico cu nos ta den”.
Minister Ruiz-Maduro a menciona cu ta incomprendibel cu tres minister di Gobierno di AVP kendenan tabata encarga cu finanza por a drumi trankil anochi mientras cu nan tabata hiba nos den e situacion desastroso aki. Un cos cu tabata sigur segun e Minister ta cu cada esfuerso durante 8 aña pa hiba nos den un direccion corecto, a wordo bombardia pa e falta di liderasgo di Mike Eman.
“Algun di e Ministernan aki a purba di bin cu un direccion caminda nos mester bay, pero na fin di dia, no a logra. Reformanan Fiscal cu lo mester a bin, no a bin, pasobra señor Eman no tabata tin curashi ni vision pa e pais aki. No a importa señor Eman kico ta e legado cu e lo laga pa e generacion aki. El a redobla e debe di nos pais. E la bin cu proyectonan PPP cu no solamente e generacion y gobernacion aki el a afecta, sino e generacionnan y gobernacionnan nos dilanti el a endueda. Esaki ta locual cu señor Eman laga atras”, Minister Ruiz-Maduro a bisa.
E mandatario encarga cu finanza di nos pais a enfatisa cu awo si nos pueblo tin un Minister President cu tin curashi pa splica nos pais cu a yega e momento pa nos tur asumi nos responsabilidad caminda nos tin di mira con nos lo tin cu drecha e asunto aki pa nos yiunan.
“Tin un ekipo a traha duro pa e pais aki pa busca solucion y ta buscando e miho solucion tur dia ainda pa drecha e situacion financiero di nos pais. E prome caminda cu nos mester cuminsa como pais ta pa nos tin un presupuesto pa aña 2018. Pasobra ni esaki, señor Eman y su bende tabata tin e desencia pa laga atras prome cu dia 1 di september 2017 manera mester tabata e caso”.
Minister Ruiz-Maduro a expresa cu desde cu a drenta Gobernacion, a lora manga y a cuminsa traha. Y diahuebs atardi, a entrega Presupuesto 2018 na Parlamento di Aruba. E mandatario a gradici tur esnan cu a traha incansablemente y bou tur precion pa Presupuesto 2018 por a wordo entrega. Gobierno di Aruba awo ta keda en espera e fecha na unda Presupuesto 2018 lo wordo trata na Parlamento y tur preguntanan cu Parlamento y pueblo tin por wordo contesta debidamente.