E fecha final pa e conseheronan fiscal entrega e lista di cliente di winstbelasting a bira 10 di april E fecha di 3 di april no ta valido mas

ORANJESTAD – Departamento di Impuesto ta participa na tur e conseheronan fiscal cu ainda mester entrega nan lista di cliente pa busca e pakete di winstbelasting 2017, cu e fecha final pa entrega e lista a cambia y awor ta 10 di april 2018.
Alabes Departamento di Impuesto ta participa cu a bin un cambio den e maneho pa cu e cartanan di apoderacion. E consehero fiscal no mester manda un carta di apoderacion di cada cliente. Pero si e mester manda Departamento di Impuesto un carta general di apoderacion den cual e ta confirma cu e ta para responsabel pa e pakete di winstbelasting yega na e cliente concerni.
Alabes mester manda e lista den forma di un Excel-file. E file aki a wordo amplia y ta disponibel riba e pagina principal di www.impuesto.aw.