Cera conoci cu e experto financiero di AVP!
Te con leu e mentira y manipulacionnan di partido AVP lo yega? Esaki ta e pregunta cu MEP ta haci na momento di lesa un comunicado di e parlamentario di AVP, Richard Arends caminda e ta puntra “con lo duna pensionado 100 florin extra pero medida lo ranca 192 florin bek”. El a duna como ehempel con un pensionado cu un entrada di 2500 florin pa luna ta bay dilanti cu 100 florin debi na e reduccion di prima di AZV cu 4%, pero na mes momento e ta bay atras cu 192 florin door di aumento di BBO y BAZV cu 2.5%.
Rekensom manipulativo
Ta pesey lo ta bon pa duna e ‘experto financiero’ Richard Arends un simpel ‘rekensommetje’ p’asina mustra su persona con ridiculo su calculo manipulativo a cay den comunidad. Ta asina cu den e caso extremo, tur hende cu un tiki tino mester por sa cu si por ehempel e aumento di BBO/BAZV di 2.5% mester wordo paga riba henter e suma na entrada di 2500 florin, cu esaki lo resulta den un pago na BBO/BAZV di 62.5 florin. Pero siguramente e caso specifico aki no ta posibel ya cu e suma di 2500 florin na entrada no por ta someti completamente na e pago di BBO/BAZV di 2.5%. Awor ta di unda e experto financiero Richard Arends a coba y saca e suma di 192 florin ta un misterio cu ta su persona so por splica pueblo y nos pensionadonan. Pero su rekensom manipulativo no ta ningun sorpresa pa nos comunidad, ya cu ta e persona aki mes tabata esun cu a haci tur e calculonan financiero pa su gobierno di AVP y cual calculonan a hiba na redoblacion di nos debe nacional den apenas 8 aña y finalmente na e desaster financiero hamas bisto den historia di Aruba.
Comparacion aumento di pensioen
Alavez sr. Arends tin e curashi pa pone man na su curason y papia awe riba bienestar di nos pensionadonan, siendo cu e ta bon na altura cu durante gobernacion di AVP (2009-2017) e pensioen di viehez (AOV) di e pensionadonan casa a aumenta cu solamente 84 florin y di esunnan soltero a aumenta cu 50 florin. Contrario na esey, bao di gobierno di MEP (2001-2009), e pensioen di e pensionadonan casa a aumenta cu 264 florin y di esunnan soltero cu 157 florin. Mester remarca si cu ni si inclui e reparatietoeslag di 100 florin cu a ser duna bao di Gabinete Eman na e pensionadonan, nunca e aumento di e suma di pensioen bao di gobierno di AVP por a yega na e nivel di aumento cu tabatin bao di e gobierno di MEP. Pues nos pensionadonan a keda atras durante e ultimo 8 añanan y esaki ta danki na e gobierno di AVP cu entre otro a bin cu e medida di hisa e edad di pensioen te cu 65 aña.
Pues locual nos por mira den e ultimo dianan aki di parti di Richard Arends ta solamente saltonan mortal y remordimento di consenshi pa trata di practica ‘damage control’, siendo cu tur hende sa cu e ta un e autornan principal di henter e desaster financiero di nos pais.