Minister Chris Romero, titular di e cartera di Sector Primario, tabata di bishita na e di dos Mercado di Santa Rosa pa e aña aki.
Durante su recorido, Minister Romero a hasi un pausa pa asina haya un splicacion mas amplio di e proyecto di aquaponics y hydroponics cu ta den desaroyo actualmente, den un colaboracion entre Santa Rosa y TNO.
E proyecto ta encera creacion di modelonan aquaponico y hydroponico, den cuadro di sostenibilidad, cual por logra contribui na un cantidad mas grandi di tanto berdura como pisca den e clima cayente cu nos ta biba aden. Tur esaki manteniendo e regla principal di baha e costonan significativamente pero uzando materialnan duradero.
Teniendo na cuenta cu nos clima ta uno severamente seco, ta adaptando e proyecto aki pa e por ta uno factibel pa nos isla.
E proposito principal di e proyecto aquaponico y hydroponico aki ta pa adapta e structura completo, cu tur datos disponibel, na e clima di Aruba.
Actualmente Santa Rosa a logra produci diferente mata herbal y hasta algun berdura uzando e structura aquaponico y hydroponico.
Awor lo bay cuminsa cu e proceso di recoleccion di cifra y datos pa asina completa e parti tecnico di e proyecto.
Minister Romero a keda sumamente satisfecho di por a mira e desaroyo di e proyecto aki.
E responsabel di e cartera di Sector Primario a compromete su mes di sera mas contacto cu institucionnan den nos region, pa asina logra yega na un intercambio di informacion mas eficiente y beneficioso pa nos agricultura. Tur esaki cu e pensamento pa den un futuro por logra yega na un independencia comestibel pa Aruba.