Ora cu un situacion desafortuna presenta, e prome pensamento ta, ken pa tira e culpa riba dje. Y kisas esaki lo ta e tema pa diferente luna of aña nos dilanti. Sin embargo realidad y liderazgo ta mustra nos un otro caminda pa cana. Den e ultimo dianan cu a transcuri nos a mira liderazgo ariba un nivel cu pa hopi tempo nos no a mira cerca lidernan politico di Aruba. Y mas ainda cerca un lider femenino cu a asumi e responsabilidad di e situacion critico, social-economico y financiero cu e gobierno actual a hereda.
E forma negligente di lidera cu nos a experiencia den e ultimo gobernacion, a resulta segun diferente rapport di instancianan imparcial, catastrofico pa nos Pais. Y ta hustamente pa motibo di negligencia den liderazgo cu ta te cu awor, e recibo ta wordo presenta na nos Pueblo. Lo tawata facil pa e lider actual di Pais Aruba, sra. Evelyn Wever Croes tuma un mey ora di su discurso na prensa y enfoca riba esnan cu realmente a permiti Aruba yega na e punto doloroso aki, sinembargo el a scoge pa asumi su responsabilidad como mandatario y informa nos pueblo debidamente.
Naturalmente despues di notanan manera “Feestvierend ten ondergaan’ un situacion asina aki a wordo anticipa, pero na momento di a encontra cu e cifranan real, sigur, uno ta wordo impacta. Nos ta consciente di e estado critico financiero cu e gobierno anterior a laga nos finanzas publico aden, ma si nos keda mira patras, mas nos lo perde den e abismo! Nos tin di fiha nos mira pa futuro y percura pa e aventuranan irealistico y di manipulacion cu cifranan no ripiti. Pero mas aun, siña di e experiencia amargo aki y sali enbusca di solucionnan duradero hunto cu otro. Esaki ta e sentimento cu a convivi den nos na momento cu nos a mira y scucha un dama Prome Minister tuma rienda di e situacion cu su gobierno a hereda, y e actitud aki lo tin un impacto significante pa Aruba por surpasa e crisis social-economico y financiero cu nos ta aden.
E bon noticia den tur esaki ta cu e forma cu lo atende y analisa e salida di e crisis aki ta di un perspectiva holistico, unda cu lo identifica cu esunnan mas debil den nos comunidad cu mester di mas sosten y aceptando apoyo di esunnan mas fuerte den nos sociedad evitando asina cu e kiebro y debacle den nos finansas publico ta continua. Trahando for di un perspectiva holistico unda cu bo ta percura pa e atencion social, e incentiva economico y empuhe financiero ta presente den bo maneho publico, ta evita cu bo ta sigui debilita esunnan mas vulnerabel den bo comunidad, pero alaves ta e iniciativa pa prepara pa inversionnan di inversionistanan serio cu kier sigui avansa.
Esaki ta un oportunidad pa nos siña di nos pasado, ahusta nos presente y mehora nos futuro. Y for di parlamento sigur nos lo percura pa introduccion di leynan estricto y control severo ta presente tur momento. E crisis financiero aki tambe ta un oportunidad pa nos pensa diferente y innova. Nos ta decisivo y motiva pa tuma e rienda pa hiba nos Pais den un direccion nobo.
Den tur esaki ta importante pa gobierno tuma tur accion manteniendo un bon comunicacion cu pueblo. Un comunicacion habri y sin manipulacion cu tur instancia y gremionan cu ta representa nan afiliadonan. Esaki lo percura pa hunto por identifica, responde y crea plannan di accion concreto pa preveni crisisnan pa futuro. Y maske cu den situacionnan manera esaki malcontento ta inevitabel, transpariencia y discusionnan constructivo ta e caminda pa cana.
E yamada ta bay pa media en general, laga nos comunica e plannan, meta y vision pa e futuro di Aruba mas transparente posibel. Y laga nos duna e espacio necesario na nos gobernantenan pa desplega nan trabou na e mihor forma posibel. For di parlamento nos lo keda transparente y critico, dunando realse na e lema ‘Aruba Prome’. Parlamento lo brinda colaboracion necesario na unda esaki ta wordo rekeri y lo percura pa e confiansa cu pueblo a bini ta sinti den e parlamento nobo aki sigui crece. Ta solamente comunicando e berdad, sea bon of malo, nos lo por sigui cultiva esaki.
Un crisis financiero ta un menasa serio pa un Pais manera Aruba. Ta wordo rekeri pa decisionnan dificil, manera atende diligentemente cu e situacion, structura e caos den gobierno y atende cu e presion di prensa y informacionnan incorecto wordo atendi cu nan. Apesar cu kisas lo tin diferencia di opinion encuanto e accionnan cu lo wordo tuma, si nan ta efectivo of inefectivo, nos ta di acuerdo ariba un cos, Prome Minister sra. Evelyn Wever Croes a asumi su responsabilidad y no a keda busca kende pa culpa.