Parlamentario Alan Howell Gobierno anterior no kier pariba di brug ni San Nicolas bon, nan kier nan mes bon

Parlamentario Alan Howell ta lamenta e echo cu gobierno di AVP a dicidi di kita un otro negoshi di pariba di brug y mande pabou di brug. E ta referi aki na keuringslokaal cu a wordo kita for di Pos Chiquito y manda pa Barcadera.
E ta bisa cu no ta solamente e forma di actua dudoso di e ex minister Sevinger ta bin dilanti aki, unda a cera un deal cu un comerciante cu ta mara nos pueblo pa 5 aña largo cu un huur hopi mas halto y pa un area mas chikito, pero tambe e forma cu a dicidi di kita un otro lugar mas for di pariba di brug, perhudicando asina un biaha mas nos hendenan cu ta biba parti pariba di Aruba.
El a recorda con anteriormente e keuringslokaal tabata na San Nicolas y a wordo kita for di e sitio aki cu e consecuencia cu a afecta e negoshinan den e cercania. Awo a manda e keuringlokaal mas pabou, kite for di pariba di brug y e comerciantenan den e area seguramente lo bay sinti e consecuencianan tambe y e ta un forma di caba cu comercio pariba di nos isla.
Howell ta bisa, cu gobierno anterior no kier pariba di brug ni San Nicolas den ningun sentido bon, nan kier nan mes bon. Nan kier favorece nan mes y otronan prome cu nan pensa riba pueblo. Howell ta spera cu Gobierno actual tuma bon nota di e tipo di practicanan aki unda no ta mata unicamente e comerciante cu no tin e contract mas, pero ta mata full un pueblo di pariba di brug caminda ta haci e comercio mas malo.
Pa loke ta trata e empleadonan di DTI e ta kere cu nan tin un dolor grandi di laga un lugar cu por ta den nan mente no tabata mucho espacioso, pero awor a bay na un lugar cu ta hopi mas chikito.
Parlamentario di POR por a compronde cu gobierno a manda algun pregunta pa Aruba Villas N.V. (e compania cu a haya e contract nobo) pasobra algun vehiculo no por ni maniobra den e keuringslokaal nobo aki.
Fraccion di POR, mirando cu ta 67 mil Florin di placa di pueblo ta wordo paga pa luna, lo sigui vigila y controla cu cada punto cu tin den e acuerdo di huur cuadra y no lo ta acepta pa cualkier di e puntonan no wordo cumpli cune.