integridad y bon gobernacion ta un prioridad grandi pa Gobierno di Gabinete Wever-Croes. Y esaki ta conta pa tur cu ta of tawata den posicionnan clave den gobernacion.
4 luna pasa cu Gabinete Wever-Croes a haya e mando pa goberna nos pais den un coalicion, a encontra un traspaso caotico di e gobierno anterior di AVP. Mesora a constata cu falta hopi ekipo entre otro customized Imac, customized computers, laptop, Ipad, y camaranan. Esakinan ta ekiponan caro y cu ta wordo uza pa conferencia di prensa.
Algun di e ekiponan aki a worde entrega bek na Gobierno y ainda falta varios articulonan cu ainda mester wordo encontra of entrega.
Recientemente, via su abogado, Ex-Minister Alex Schwengle a entrega su computernan y telefoon cellular na Bestuurskantoor. No ta conoci e motibo pa cua e ex-mandatario a dicidi di keda cu e articulonan aki cu no ta di su pertenencia, sinembargo e hecho cu el a bin dilanti y entrega esakinan por sirbi como un ehempel pa si acaso tin otro mandatarionan di e Gabinete di AVP cu tambe tin pertenencianan di Gobierno ainda den nan poder, nan tambe por entrega esakinan.
Gabinete Wever-Croes ta un Gobierno serio y esaki lo wordo sinti den tur maneho di e Gobierno aki. Y tur ekipo cu tin y cu lo wordo cumpra ta wordo registra debidamente. Bon gobernacion ta cuminsa cu orden y respet.