Gobierno di AVP den ocho aña a haci y deshaci manera nan ta haya ta bon contra tur regla. Ta parce cu e Gobierno di AVP y henter e Partido AVP no conoce mucho menos ta respeta tur loke ta dentro di ley na nos pais.
Gobierno di AVP aña pasa na juli a manda busca Robert Candelaria, cu tabata biba na Corsou, pa subi lista di AVP. Riba costo di Gobierno Robert Candelaria a biaha bin Aruba 5 biaha prome cu el a subi riba lista, incluyendo e dia cu el a bin Aruba pa entrega lista.
Pero e paso aki no a bay asina facil pa Partido AVP pasobra nan a topa cu un Candelaria hopi exigente kende a pone condicionnan pisa pa subi lista sin importa cuanto e costo lo ta pa pais Aruba y si ta contra regla of no. AVP a cumpli cu e siguiente condicionnan di Candelaria:
1. Candelaria a exigi un salario barbaro mesora, sin mester traha. Pues el a bira coordinador! Asina e no mester a traha, e no tawata tin mester a campaña, e no mester a organisa yen di fundraising pa campaña. Djis e mester a biba lekker y warda eleccion yega.
2. Pa Candelaria bin Aruba durante e temporada di campaña, Gobierno mester a paga tur su biahenan! No solamente p’e sino pa su famia tambe! Varios “dienstreis” pueblo mester a paga pa Candelaria.
3. Despues di eleccion, mirando cu AVP ta bay perde eleccion, Candelaria mester a wordo nombra director di Scheepvaart exigiendo un salario hopi halto! Tur hende a kere cu esey ta tur, wel awor mas puito ta sali di e macuto.
4. Ta resulta cu Candelaria a exigi pa su casa haya trabou den Gobierno bek pero no caminda e tabata traha antes cu tawata na Polis. E señora ta Polis pero no kier traha na Polis mas. P’esey el a exigi cu mester bay traha na impuesto. Contra tur clase di regla esaki a tuma luga y awor personal di Impuesto ta exigi pa e señora bay bek Polis. E no sa nada di belasting y p’esey no tin confiansa den dje. E señora ta eynan politicamente door di e presion cu exigencianan di su casa Robert Candelaria a pone riba AVP.
Nos por mira cu e condicionnan cu Candelaria a pone riba Gobierno anterior no ta na beneficio di nos pueblo. Ohala cu Gobierno actua lihe prome cu e situacion sali for di man. Si e mester traha, mand’e bay traha na Polis pasobra Aruba mester di Polis, y eynan si porta e por fungi miho y no na Belastingdienst na unda cu ta parce cu e no ta bon bini pa falta di conocemento y experiencia di e trabou y puesto cu el a exigi.
Candelaria mester tin berguensa di su mes. Ta un abuso marca mayor a wordo cometi contra pueblo pa acomoda e y su casa y awor pueblo mester paga e cuenta! Anto e abusador aki awo ta Parlamentario di AVP! Berguensa!