Parlamentario Endy Croes ta splica cu el a scucha ex Prome Minister kende ta e autor principal cu a destrosa e pais aki na un forma feroz creando e Mega Debe, esta Mike Eman kende a reacciona riba e ‘crisis heffing’ cu Gabinete Wever Croes a anuncia pa entre otro paga e proyectonan PPP. Definitivamente ta keda comproba cu Mike Eman tin un “gekke tik”. Eman a declara lo siguiente: “Nos pais tabata canando den un direccion positivo caminda cada aña nos tabata bahando e deficit di pais Aruba”. Parlamentario Croes ta puntra su mes ta con sinberguensa un ex lider por ta? Un lobo den cuero di carne.
Debe di 49% pa 93% di GDP
Un solo pregunta nos mester haci nos mes y e contesta lo aclaria tur cos. Debe relata na GDP di pais Aruba tabata na 2009 na 49%, esta 49 cen di cada florin cu drenta caha di gobierno tabata comprometi pa paga debe. Tur esaki ta refleha e maneho di 23 aña di Status Aparte, pues desde 1986 pa 2009 di tur signatura di gobiernonan hunto. Den 8 aña Mike Eman a redobla e debe nacional di pais Aruba cual a alcansa 93% di GDP. Pues awe 93 cen di cada florin ta comprometi na debe. Cu esaki no mester mas discusion y e Mega Debe tin nomber y fam, esta Mike Eman y AVP.
Elimina BBO
Tambe Mike “met zijn gekke tik” a declara cu nan a reduci e BBO di MEP. Mi mester recorda Mike cu el a core campaña cu AVP lo “ELIMINA BBO” y no reduci BBO. Mike atrobe no tabata honesto pasobra e no a splica cu el a claba pueblo 2% di BBO bou nomber di BAZV. Pues a haya un BBO na 3% y a core campaña priminiti pueblo cu lo elimina BBO pero den 8 aña a entrega pueblo esaki na 3.5%. Mike Eman a claba pueblo tambe cu e aumento di edad di pensioen di 60 pa 65 aña den un solo tiro. E 2% di BAZV y aumento di edad di pensioen segun Mike no ta medida.
Regalonan pa amiguitonan di Mike
Mike Eman a endueda Aruba regalando su amigonan miyones. Patrick Paskel di Tera group 8 MIYON, PAXI tambe di Patrick Paskel 1.3 MIYON, TNO y Phillips Group 10 MIYON, Oscar Fernandez 128 mil den 2017, Sebastian pa saca potret pe y traha riba Mike su facebook 27 Mil pa luna, Abogadonan amigo di cas 15 MIYON pa aña, biahamento 2 MIYON pa aña. Un total di 400 coordinador di cual Mike so tabatin 147 coordinador riba payroll di cual hopi no ta ni yega trabao. Averahe salario di Afl. 9000 pa luna, mayoria sin ningun preparacion. Tabata tin coordinador cu salario di 25 mil pa luna, diferente cu contractnan di Afl. 17 mil, 15 mil etc etc. Mas di 8000 papel di tereno firma pa brother di Mike, esta Benny Langevingers. Benny cu Mike a firma pa 7000 camber di hotel extra cu mester bay wordo construi awor. Dia 22 di september 2017 riba e dia di eleccion ainda Mike cu Benny a firma un contract y mara Aruba cu un huur di 4.1 MIYON florin pa un lugar di keur auto na Barcadera.
Mas debe riba lomba di pueblo
Mike a firma contract bay goal tipo PPP projecten manera Watty Vos Boulevard, Green Corridor, Hospital sin cu tin nada presupuesta con lo paga nan. Awor e recibo a wordo presenta pa Pueblo unda mester bay paga pa 20 aña largo 81 MIYON florin pa aña. PPP a bira awor Pa PUEBLO PAGA. Asina aki Mike a maneha Bo pais. E descarado aki pa no yam’e desgraciado tin cuero di cara pa gaña na Canal 90 cu Pais Aruba tabata canando den direccion positivo y cu e deficit tabata bahando. Wak Bo yiu chikito den su cara y splik’e cu Mike a pak e cu un debe riba su lomba. Bon Trabao!! Fiesta a caba y ohala cu e sinberguensanan aki no bin hamas y nunca na poder. Ta tuma un Lider y un gobierno hopi curashi pa drecha e desaster financiero hereda aki. Ta pidi pueblo tur comprension pa nos brasa otro y cana e caminda hunto pa crusa e brug amargo aki, pero cu Fe y Speransa cu nos lo sali pronto pa converti e amargura aki den felicidad pa e pueblo. Na mesun momento Parlamentario Croes ta pidi pueblo disculpa kisas pa e tono pero no tin otro manera pa adresa un manipulador mentiroso psicopatico kende tin alaves un “gekke tik” pa e manera cu el a destrosa nos pais. Mas tristo ta cu e no a drenta Parlamento y asina a traiciona tur su votadornan y su partido.
