Oranjestad – Diaranson merdia durante patruya, agentenan ta mira un grupo di adicto humando base.
Agentenan a stop e auto y baha pa bay controla.
Loke a hala nan atencion ta e hecho cu 1 di nan a lanta y cuminsa cana lihe bay direccion nort. E agentenan a cuminsa cana su tras, y dado momento ela cuminsa core.
Hunto cune e tawata tin un rugtas.
Ela cora bay direccion Boliviastraat, caminda ela laga su slofnan atras pa asina por core miho.
Asina ela keda core pasa den Nicaraguastraat, Weststraat y despues ela drenta Braziliestraat, caminda ela bay sconde tras di un auto.
Ela bolbe cuminsa core altura di Colombiastraat unda ela bula den un cura y a core bay na e parti patras pa sigui su ruta den Colombiastraat.
Aki ta caminda ela bay trata na bula over un cura di hero, pero e agente a logra gare na su jeans.
Asina mes na halto ela cuminsa manda algun skop den direccion di e agente.
Ela cuminsa grita cu e ta ilegal ariba e isla, mes ora ela wordo deteni.
Den e rugtas a haya sker y un pipa di base, tambe algun otro tools.
E persona aki a bisa polis cu ta ariba caya e ta biba y no tin net nada.
Na warda di Playa nan a entrega na personal di IASA, pendiente deportacion.
