Home » Parlamentario Robert Candelaria: Marihuana como pilar economico ta simplemente algo inaceptabel

Parlamentario Robert Candelaria: Marihuana como pilar economico ta simplemente algo inaceptabel

by Admin
0 comment 56 views

Durante di un ‘bijeenkomst’ cu Parlamento siman pasa, Prome Minister Wever Croes no a contesta tur pregunta cu a ser haci na su persona dor di miembronan di e fraccion di oposicion, esta AVP y riba cual miembro di e fraccion berde, sr Robert Candelaria ta mustra.

Pero un pregunta cu si Prome Minister  a logra di duna contesta riba dje den forma cla,  tabata si por bin cu plantacion di hemp si acaso e refineria no habri bek.

“Pa esunnan cu no sa, hemp ta un nomber mas bunita na Ingles pa loke nos conoce den boca di pueblo como e mata for di cua ta produci marihuana.

Prome Minister a bisa cu tin un comision ta evaluando esaki  pa uzo medicinal. El a indica cu e mesun comision aki por wak tambe si mester importa e producto aki of si mester cultiva e producto aki localmente.

Hasta Prome Minister a papia di cultivacion di marihuana como un pilar economico nobo pa Aruba y mi persona no por compronde e contesta aki.

Na prome luga eaki ta bay contra logica pa compara loke un refineria ta produci na empleo, impuesto, divisa pa un pais, compara c’un plantacion di marihuana. No por compara esaki, of mester uza terenonan sumamente grandi di pais Aruba pa produci asina hopi marihuana pa papia di e mesun cantidad di empleo, impuesto y divisa.

Tin tanto forma pa diversifica nos economia y pa pensa cu nos ta considera cultivacion di marihuana pa reemplasa refineria, ta algo cu ta  preocupa nos masha hopi.

Pues no cu a haci’e, pero cu ta hasta considera esaki ta algo hopi preocupante.
Si gobierno kier papia di cultiva, ban stimula cultivacion di loke nos por come. Nos tin problema cu importacion di fruta y berdura, pero nos tin agricultornan local cu nos por yuda pa produci cuminda pa consumo local y exporta. Ta imposibel pa compronde cu nos kier hasta considera marihuana como un pilar economico.

Pa uza cannabis medicinalmente, no mester cultiva esaki na Aruba ya cu remedinan cu nos ta cumpra na botica awendia, no ta wordo produci aki. Pues e argumento pa cultiva cannabis aki pa por produci remedi di dje, no ta valido at all.

Lo bo mester tin di laboratorio completo pa logra saca e zeta pa medicina. Loke nos impresion ta cu si mester cultiva esaki localmente, no ta pa remedi, pero ta pa huma esaki.

Ta lanta e pregunta e ora si henter  gobierno ta para tras di esaki. Minister di husticia, kico ta bo opinion? Aruba, nos no por ta desea aki.

Jamaica cu ta cerca di nos, a caba di haya un anuncio di IMF cu nan criminalidad ta caba cu nan economia. Turistanan no ta safe aya mas. Aruba, nos no por permiti esaki.

Mester traha riba prevencion di criminalidad y di adiccion y no stimula esaki dor di planta e cos aki mes y despues bisa pueblo y nos hobennan, pa corda no bay hum’e pasobra e ta malo pa bo. Tin un flyer di Fada cu ta papia di e riesgonan, laga nos scucha di nos profesionalnan.

 

Como gobierno di un pais, bo mester traha pa cuida un pueblo y no pa hundi un pueblo. Marihuana keto bay ta un droga prohibi. Papia cu cualkier profesional den field y puntra con hende adicto a cuminsa na nan adiccion y aki tin cu bisa cu adiccion ta algo progresivo.

E ta cuminsa un caminda pero e kier sigui destrui e persona y ta keda ranca e hende abou poco poco te ora e caba cu e persona.

Tur profesional cu mi a papia cu’ne y ex adicto a bisa cu nan a cuminsa uza droga cu marihuana. Despues e no tabata duna e ‘high’ desea mas y a bay test otro droga mas pisa y a keda pega den dje. Awendia e edad cu hobennan ta experimenta cu e droga ta birando mas y mas hoben.

Gobierno, por fabor  traha riba e problema social grandi cu nos tin na Aruba y no empeora esaki. Ta berdad cu no ta tur hende cu uza marihuana recreacionalmente ta bira adicto cu lo sigui den e circulo vicioso di adiccion, mescos cu no ta tur hende cu bebe un cerbes ta bira un alcoholico. Pero nos mester cuida nos pueblo y no planta marihuana y asina expone pueblo na un droga y spera despues cu nan no bay hum’e y bira adicto,” Parlamentario Robert Candelaria ta declara.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio