ORANJESTAD – E declaracionan reciente di minister encarga cu finansa publico ta mustra un biaha mas un falta di conocemento y capacidad pa por ehecuta e responsabilidad di gobernacion,” Sr. Richard Arends, miembro di fraccion di AVP den Parlamento, a declara.
El a reacciona riba un declaracion reciente di e minister encarga cu finansa kende a bisa publicamente cu 93 cen di cada florin cu nos ta genera den nos economia ta bay pa paga debe. “E comparacion cu e mandatario a haci ta completamente eroneo: el a dividi e debe total cu ta madura den terminonan di varios aña door di e volumen di actividadnan economico di un solo aña,” Arends a splica. “Cu tipo di manipulacionnan asina, obviamente bo ta yega na cifranan despropocional y ta politisa temanan serio.”
E debe total ta consisti di varios fiansa cu tin diferente termino di vencimiento: algun di nan ta caduda den 5 pa 7 aña, otronan ta caduca riba un termino mas largo, esta di 10 pa 12 aña. E debe total ta inclui e suma di tur e diferente fiansanan, pero esaki no ta nifica cu nan mester wordo paga den un solo aña, mirando cu nan ta basa riba acuerdo di fiansanan individual pa un termino di varios aña manera nan ta wordo acorda.
Contrario na esaki, e volumen di bo economia ta e resultado di tur inversion, consumo, exportacion y importacion den un periodo di un aña. “Ta mescos si mi tuma e proporcion di un hypotheek di 30 aña cu entrada anual di un persona of famia. Esaki ta irasonable y aki tin cu bisa cu minister ta comparando appel cu peer,” e parlamentario a ilustra.
“E proporcion cu ta aplicabel den e discusion aki ta entre loke bo mester paga back na capital y interes den un aña y e volumen di economia di e mesun aña ey,” parlamentario Sr. Arends a declara.
E parlamentario ta kere firmemento cu ta importante pa habri e discusion rond di finansa publico di manera obhetivo.“Di e manera aki nos por hiba un discusion sensato riba ki maneho financiero mester hiba. “Tira cifranan den laira pa entretene un consumo politico local tin repercusionnan enorme pa nos clima di inversion, como tambe pa e credibilidad di Aruba riba mercado internacional cu dificilmente por elimina. Un perdida di confiansa cu lo dura hopi pa por recupera.
“Tanten cu bo tin un deficit den bo presupuesto – esta cu bo entradanan ta menos cu bo gastonan – bo mester fia placa pa cubri esaki y bo debe ta sigui subi. Bo por papia di solamente di reduccion di debe, ora cu bo tin ‘balanced budget’ of ora cu bo tin un surplus – loke cu tabata prescribi pa sosode na 2018. Na momento cu bo no tin crecemento economico e proporcion di e deficit of e debe ta aumenta gradualmente.
For di aña 2014, gobierno bou signatura di AVP a entrega na Parlamento 3 presupuesto, 3 presupuesto supletorio, 3 cuenta anual y raportnan di entrada y gastonan di pais Aruba pa 10 cuartal consecutivo. Tur e documentonan aki ta den dominio publico y tur cifra aden a wordo suministra door di Departamento di Finansa, Departamento di Impuesto, di Aduana y a wordo controla y revisa pa Rekenkamer y Colegio di Supervision Financiero temporario di Aruba, CAFT. “Espacio pa manipula no tabata existi. Awe nos ta 6 luna caba despues di elecion y ainda Gobierno no a presenta un plan financiero, ni tampoco un plan economico”, Arends a finalisa bisando.