Parlamentario Endy Croes ta splica cu e no por compronde cu esunnan cu a causa e “Desaster Financiero” di pais Aruba awe ainda tin cuero di cara pa papia y/of cana den pueblo. Pueblo mester cuminsa rechasa e prototiponan aki publicamente. Richard Arends tabata un di e actornan principal desde inicio. Desde 2009 el a profila den FESCA y AVP e tempo aya tabata gaba cu nan no tin 1 pero 2 presupuesto alternativo pa pais Aruba.
Debe 93% di GDP
Den 23 aña di Status Aparte di 1986 te cu 2009 nunca e debe nacional a surpasa 50% di GDP. Tur rapport ta papia cla. Den 8 aña di AVP, incluyendo 4 aña di CAFT, e debe a alcansa 93% di GDP. Kico esaki kiermen? Di cada florin cu drenta caha di gobierno, 93 cen ta comprometi pa paga debe di pais y 7 cen ta resta pa gobierno rond un pais. Esaki ta e crimen cu Mike Eman y Richard Arends a comete cu e pueblo aki. Richard tambe ta hinca den e deal di CITGO. Door di maneho di entre otro di Richard Arends nan a aproba pa pone un entrada artificial y ficticio di 73 MIYON di CITGO pa cu aña 2017 cual suma nunca a drenta caha di gobierno te cu awe. Asina Richard Arends kende ta profilando su mes pa e proximo Lider di AVP, alaves garantisa lo ta un lider fracasa tabata maneha e pais aki.
Pueblo a bay 30 aña atras
Den 8 aña di AVP nan maneho tabata tin un deficit acumula di 2.2 BIYON, pues mester a presta 2 mil 200 MIYON florin pa tapa e buraconan di nan mal maneho den 8 aña. Tur esaki sin conta e PPP proyectonan cual awor riba tur esaki pueblo lo mester cuminsa paga 80.5 MIYON pa aña pa e proximo 20 añanan y cu lo mester wordo agrega riba e 2.2 BIYON. Pueblo lo por kere Richard Arends ainda? Pueblo por confia pushi cu pisca? Politiconan di AVP mester keda leu di placa y leu di maneho. Manera Richard Arends su best friend Benny Sevinger a bisa publicamente den Parlamento cu nan “NO ta give a DAMN”. Awor Richard Arends cu su cara di “coco” kier bin pretende cu ta debenan di MEP. Pues Pueblo tin boso door. Boso a desgracia e pais aki mandando e pueblo aki 30 aña atras y na rand di bancarota. Un nota pa henter comunidad. Ki ora cu un miembro di AVP papia di finansas di Aruba, haci nan 2 pregunta: 1. Cuanto e debe nacional tabata ta na 2009? Contesta corecto ta 49% (esaki ta den 23 aña di gobierno hunto di 1986 pa 2009). 2. Cuanto e debe nacional ta na 2018? Contesta corecto ta 93% (8 aña di AVP 2010-2017). No tin discusion y punto!
Finalmente Endy Croes ta termina pidiendo nos Pueblo pa mantene e Fe y confiansa cu nos lo saca Aruba for di e desaster causa pa AVP.