Parlamentario Shailiny Tromp-Lee (MEP) reaccionando ariba parlamentario Richard Arends (AVP) Parti 1

Durante rueda di prensa di e siman aki mi a reacciona riba diferente ponencia di parlamentario Richard Arends pa loke ta trata finansas publico y minister di Finansas y Economia.
Den medionan di comunicacion skirbi Richard Arends e remarca cu lo tabata hopi mas elegante si Minister di Finansas y Economia a bin Parlamento pa duna splicacion na e organo na cual e tin cu responde na dje y no na CAFT. Ironia di bida ta cu ta net Gabinete Eman II, na cual sr. Arends a forma parti di dje, a percura pa awe mester ‘duna cuenta’ y pidi ‘aprobacion’ di CAFT pa loke ta trata e plan financiero di Pais Aruba. Ta Mike Eman a firma dia 2 di mei 2015 e palabracion caminda, no obstante e echo cu nan ta subraya cu finansas publico ta responsabilidad di Pais Aruba, toch Gabinete Eman II ta indica cu ta desea pa institui un supervision structural independiente. Entregando na e manera aki nos autonomia financiero.
Mas importante ta e motibo pakico Gabinete Eman II ‘supuestamente’ mes a bin cu e inciativa pa pidi pa introduci CFT, despues CAFT y LAFT. Pueblo y sr. Arends nunca mester lubida pasado! Pasobra e unico manera pa compronde nos presente ta door di conoce nos pasado, cual mi ta convenci lo yuda nos determina nos futuro. E unico motibo pakico awe nos tin un CAFT y LAFT ta e maneho financiero desastroso cu Gabinete Mike Eman a hiba cual a conduci cu Aruba a perde su credibilidad financiero door di redobla nos Debe na GDP di 49% (2009 MEP) pa 90% (2017 AVP). Di cada florin cu drenta caha di gobierno, 90 cen ta bay pa paga debe. Algo unico den e historia di Pais Aruba, danki na e.o. Mike Eman y Richard Arends. Na 2009 Gabinete Oduber a bay laga un debe atras di 2.2 biyon florin cu awe na 2018 ta den careda di 4.3 biyon florin. Cu awe Gobierno ta negocia cu CAFT ta pa e solo echo cu ta irealistico pa spera cu e desaster financiero realisa den 8 aña, MEP lo por drecha den 3 aña. Pueblo mester ta consciente cu ta trata di retonan grandi cu ta rekeri curashi y determinacion pa percura cu Aruba ta haya su credibilidad financiero bek y cu nos por garantisa un bon futuro pa nos yiu y nan yiunan.
Otro punto masha remarcabel ta e echo cu sr. Arends ta haci un apelacion publico na su coleganan Parlamentario pa sinta y hancra e plan financiero di gobierno den un ley manera nan a bin ta haci ultimo añanan. Segun Arends, finansas publico ta un di areanan di maneho cu mas a wordo scrutina y cu semper tabatin transparencia. Lastimamente cu no obstante su palabranan bunita aki (cual aparentemente nan significacion ta otro cu di mi) y e elogio propio pa loke ta trata entregamento di presupuesto, presupuesto supletorio, cuentanan anual y reportenan AVP , Mike Eman no por a percura pa maneha nos finansas publico na un manera responsabel y duradero. Contrario a aplica hopi creatividad, pronosticonan irealistico y manipulacion ariba papel pa cumpli cu normanan palabra.