62
Diasabra ultimo a tuma luga na Compleho Deportivo Frans Figaroa e campeonato di Himno y Bandera organisa pa ARTBO cu participacion di 8 scol di Taekwondo cu un total di 41 poule. Nos refreenan internacional tabata presente y a guia e evento for di mainta te cu atardi. 10’or y mey di mainta a cuminsa cu e ceremonia y Minister Dangui Oduber a hiba palabra, sigui pa sr. Di Estefano Wernet di Lotto pa Deporte. Minister Dangui Oduber a keda impreciona di e bon trabou cu Taekwondo ta haciendo na Aruba y internacional, poniendo e nomber di Aruba na laira na mundo. Minister Dangui Oduber a bisa tambe cu Taekwondo ta un di e deportenan na Aruba cu mas ta destacando na e momentonan aki, mirando cu nos atleta a clasifica pa CAC.
Presidente di Aruba Taekwondo Bond Dr. Guaicaipuro Jimenez a hiba palabra y a gradici e scolnan pa nan participacion na e campeonato nacional Himno y Bandera. Sr. Presidente a presenta e unico atleta cu Aruba tin cu ta preparando pa e campeonatonan internacional di Para Taekwondo cu e focus ariba 2020. Na final Dr. Guaicaipuro Jimenez a gradici tur esnan presente pa nan apoyo y nan sosten na Taekwondo y cu awe por mira atras ariba un Taekwondo cu a crece masha hopi mes aki na Aruba, mirando cu dos scol mas a habri nan portanan y ta haci cu awo por conta cu mas partcipacion na nos eventonan di Taekwondo.