DEZHI y Exprodesk ta organisa tayer ‘Propiedad Intelectual, Con pa Protege?’ y ‘Raising your Digital IQ’ riba diahuebs 22 di maart 2018.

Oranjestad – Departamento di Asuntonan Economico, Comercio y Industria (DEZHI) y su unit Exprodesk, den conhunto cu Oficina di Propiedad Intelectual (OPI) y Defiant Concepts ta organisa dos tayer dia 22 di maart, 2018, for di 9or di mainta te cu 12or di merdia. E tayernan aki ta consisti di dos topico, e prome ta ‘Propiedad Intelectual, Con pa Protege?’, y e di dos ta ‘Raising your Digital IQ’.
DEZHI su unit Exprodesk ta organisa e tayernan aki cu e meta pa brinda personanan den e Industria Creativo na Aruba, e conocemento concreto y practico pa aplica loke nan a siña, den nan carera profesional y stimula esnan interesa den exporta nan creacion.
E prome parti di e workshop lo toca e tema di Derecho di Autor, y lo wordo presenta pa sra. Maria Ridderstaat, sr. Michel Thode y sra. Adeline Rojer-Geerman di OPI, cu ta personanan cu hopi conocemento den e area aki. E di dos parti di e workshop lo ta tocante e tema ‘Raising your Digital IQ’, y esaki lo ta presenta door di sr. Bruce Harms di Defiant Concepts. Sr. Harms tin hopi aña di experiencia den e sector di marketing y den duna tayernan na Aruba. Nos ta spera cu participantenan lo por beneficia y siña mas di con pa uza medionan digital pa promove nan mes den mercado local y internacional. Tambe cu participantenan lo comprende e derechonan cu nan tin riba nan propiedad intelectual y con pa proteha esaki.
DEZHI y su unit Exprodesk ta invita tur interesado pa participa den e tayernan aki dia 22 di maart, 2018, for di 9or di mainta te cu 12or. E tayernan aki ta completamente gratis, pero e espacio ta limita. Pa e motibo aki nos ta pidi participantenan pa registra na tempo.
E tayernan aki lo tuma luga na Departamento di Asuntonan Economico, Comercio, y Industria, cu ta situa na L.G Smith Boulevard #160, na edificio di Sun Plaza, riba segundo piso. Pa registra por mail nos na [email protected]. Pa mas informacion por bishita nos website www.exprodesk.com of nos facebook page www.facebook.com/exprodesk.