Diamars mainta Director di Arutram N.V. Teo Croes a firma un Memorandum of Understanding cu Presidente di Stichting Rancho, Clifford Rosa.
Pa algun tempo caba Arutram ta mirando e posibilidadnan pa mehora y expande e servicio cu ta brinda na tanto local como turista.
Den mundo actual e interes pa loke ta cultura y historia ta creciendo drasticamente. Turistanan ora bishita un lugar kier conoce mas di e raiznan di e lugar, pero tambe nos propio hendenan kier sa mas di loke ta nos mesun historia y nos mesun cultura. Teniendo na cuenta e puntonan di salida aki y mirando e rikesa cultural y historico cu tin den centro di ciudad, a tuma e decision di bay den e direccion aki.
Stichting Rancho pa hopi aña caba ta dedicando nan mes na documenta e historia di e parti aki di nos isla y e ayudo cu nan por brinda Arutram pa logra e meta ta uno masha grandi mes.
Asina por bisa cu intencion di e memorando aki ta pa hisa e nivel di conocemento di trahadornan di Arutram N.V. pa loke ta e area di operacion di Arutram y den cuadro di nos herencia historico y cultural. Di e forma aki trahadornan di Arutram lo por duna e informacion mas corecto y al caso pa tanto e turista como e local cu ta haci uzo di e tramnan.
Cultura y historia ta un parti importante di un pais y nos isla ta hopi rico den esaki manera a menciona ariba y Arutram ta trahando pa por yega na e punto cu por comparti e rikesa aki di centro di nos isla cu tur usuario, concentrando riba e ruta cu e tramnan ta core. Esaki ta e prome paso den varios otro cu Arutram ta tumando pa mehora e calidad di nan servicio na cada un di su usuarionan!