Den union nos ta logra cosnan grandi pa nos pais
Diadomingo mainta, dia cu Aruba a celebra nos dia di Himno y Bandera, Gobierno di Aruba tawata tin acto protocolar na Plaza Libertador Betico François “Betico” Croes.
Presente na e acto protocolar tawata Gobernador di Corsou, Gobernador di Aruba, Prome Minister di Corsou y Aruba, Presidente di Corsou y Aruba, Demas mandatarionan di Corsou, Boneiro y Aruba, Consuladonan y un publico grandi di nos comunidad.
Prome Minister Evelyn Wever-Croes a entrega un discurso pa nos pueblo encurashando tur pa sigui uni pa asina hunto nos por logra metanan pa e pais aki y paisnan den Reino por bay dilanti
“Awe riba un dia hopi especial, nos ta conmemora y celebra e hecho cu 42 aña pasa Aruba a pasa na pertenece na e paisnan cu tin su propio simbolonan di identidad: nos pais a haya su Himno y su Bandera.
E tempo ey, na aña 1976, Aruba tabata parti di Antiya Hulandes, y den curason di nos pueblo tabata biba e deseo di ta liber. E gran politico y estadista di e tempo ey sr. Betico Croes dfm, a realisa cu un pueblo no por ta liber si e no tin su simbolonan di identidad y libertad.
A cuminsa diseña nos bandera, y a invita henter comunidad pa entrega pinturanan. Un total di 693 pintura a wordo entrega , gran mayoria pinta pa nos muchanan di school. E creatividadnan aki tabata e base pa hunto cu expertonan internacional a produci 42 aña pasa nos bunita bandera tan stima.
E colornan di nos bandera tin nificacionnan especial. E blauw di nos lama, e cora di e sanger di indjan y e cariño y amor pa nos isla, e blanco di e santo di nos playanan y puresa di curason di nos hendenan, e geel di ambundancia di antaño di industrianan di oro, fosfato y aloe. Esaki a forma nos bunita bandera y nos identidad.
E presentacion di nos bandera 42 aña pasa, tabata un experiencia riba su mes. Ami ta corda e tempo ey con esnan cu tabata mustra interes den nos himno y nos bandera tabata wordo persigui. Den forma casi clandestine nos e tempo ey como muchanan di scol, a participa na e presentacion di nos bandera den Wilhelmina Stadion. Pero cu orguyo y sin miedo. E experiencia di mira nos bandera bay halto pa prome biaha, nunca mi por lubida, y cada aña di nobo, ta yena mi cu emocion.
Nos himno, Aruba Dushi Tera, a bin di ta un cancion popular cu hopi sentimiento patriotico. E cancion a wordo componi na 1951 pa sr. Padu Lampe y sr. Rufo Wever a bira e faborito di e comision encarga cu nos Himno. Pero pa haci’e di un cancion popular pa un Himno, mester a agrega un tercer couplet, componi pa sr. Hubert Lio Booi.
E di tres couplet ta contene e esencia di nos ser
Grandesa di bo pueblo ta
Su gran cordialidad
Cu Dios por guia y conserva
Su amor pa libertad
Awe, laga nos reflecciona riba esaki.
E cordialidad di nos pueblo
E amor pa libertad.
Mi kier gradici curason un y tur cu a traha incansable decadanan pasa y a forma parti di e historia bunita aki, y esnan cu ta sigui cu e tareanan incansable aki.
Mi ta pidi boso pa nos haci e compromiso cu nos lo percura pa e bunita historia aki no bay perdi. Ban inculc’e den nos yiunan, den tur cu ta biba na Aruba, e norma y balornan grandi di nos Himno y Bandera, y ban aprecia y respeta nos identidad.
FUTURO
Y ban enfrenta e retonan diario cu e mesun fervor cu nos himno ta bisa. Pa nos lucha pa mantene nos libertad. Aruba ta enfrentando retonan grandi. Retonan social. Retonan financiero. Retonan den relacionnan cu pais bisiña.
Pero mescos cu na 1986, momento cu Aruba a haya su Status Aparte, mi tin tur Fe y Confiansa cu nos lo surpasa e retonan aki.
Mescos cu na 1986, nos a logra cosnan grandi pa nos pais, pasobra nos a sa di uni. Y esaki ta momentonan cu ta exigi UNION den nos pueblo, UNION cu nos rumannan den Reino. Union ta nos forsa.
Pa surpasa e retonan nos mester di vision.
Vision unda nos ta mira Aruba aki 10, 20, 30 aña. Vision a trabes di innovacion, con nos ta prepara nos yiunan y nan yiunan pa nan posicion den un mundo cu ta cambiando.
Di naturalesa nos ta un comunidad sumamente creativo, mira e creatividad riba un dia manera awe, of durante periodo di carnival. Pero ta yega un momento cu nos ta perde esaki door di e desafionan diario. Y pesey, si nos kier innova, si nos kier prepara nos muchanan pa trabounan cu awe no ta ni existi, nos mester mantene e creatividad ey, a trabes di enseñansa y a trabes di innovacion.
Pero cu vision so, nos no tey ainda. Nos mester tin determinacion. Nos mester ta determina den logra nos meta: un miho Aruba pa tur ciudadano, irespecto e desafionan. Irespecto con dificil e por ta awor.
Y finalmente mester di curashi.
Curashi pa tuma e decisionnan dificil cu mester wordo tuma, sabiendo cu esaki lo trece prosperidad y bienestar pa tur despues.
Ta tuma vision, curashi y determinacion, pa nos atende cu nos retonan, pa nos surpasa nan y pa asina nos conserva nos libertad, manera nos ta canta tur dia den nos himno.
Como pais nos ta enfrentando retonan hopi grandi na e momentonan aki, pero e dia manera awe, esta Dia di nos Himno y Bandera ta brinda nos e oportunidad pa refleha, yenando nos cu inspiracion, curashi y amor patrio pa den union nos atende cu tur reto, pa garantisa felicidad di e pueblo aki.
Mi ta gradici boso pa boso presencia, especialmente nos invitadonan cu a bin di otro pais pa awe celebra cu nos. Nos ta honra pa boso presencia, cu ta e muestra di union entre nos pais y islanan. Esaki ta duna mi tambe e speransa di e UNION cu nos mester logra, tanto aki na Aruba como cu nos rumannan den Reino.
Felis Dia di Himno y Bandera, y cu Dios por guia y conserva e amor pa nos libertad.