E ekipo di La Fama division Damas ta sigui riba e caminda pa logra su clasificacion entre e prome cuater di e campeonato cu ta duna derecho na participacion den e serie semi final.
Cu dos gol anota pa e medio campista Lissandra Frandl y otro mas di e hoben delantero Shadira Croes, La Fama ta supera e ekipo di Arsenal cu anotacion di 3-0 den un wega cu e ekipo di Savaneta a domina for di comienso te fin.
E triunfo ta duna La Fama un total di 19 punto y ta ocupa e di tres puesto riba e tabla di posicion mientras cu Arsenal ta keda cu cero punto empata cu Deportivo Nacional.
Na inicio di e encuentro La Fama a domina e accion riba tereno caminda Arsenal a limita su mes na hunga cu hopi hungado den medio campo y defensa, buscando un forma pa contra atake pa sorprende e defensa di e ekipo di Savaneta.
Sinembargo e defensa di La Fama forma pa Nicole Garcia, Rosa Montiel y Algeisha a hunga hopi cera y no a permiti su mes wordo sorprendi mientras cu den medio campo La Fama a domina por completo.
Sinembargo a bin dura te na di 19 minuut di wega cu La Fama ta logra saca bentaha di 1-0 ora cu e campista Lissandra Frandl ta los un tiro di distancia cu ta sorprende keeper di Arsenal ora cu e bala a bay pega den skina ariba for di su alcance.
Un tremendo gol den un periodo cu La Fama a domina totalmente pero no por a yega na mas gol y a dura te na di 32 minuut ora cu mesun hungado Fradl, ta bolbe los un tiro duro for di pafo di arena penal cu ta lastra bay pega den skina abou pa duna La Fama bentaha comodo di 2-0 y cu cual anotacion e prome tempo a finalisa.
E situacion no a cambia den di dos tempo cu La Fama dominando pero no tabata efectivo den e parti final di su atakenan y e defensa di Arsenal trahando duro pa evita mas gol pero na di 65 minuut tabata e centro delantero Shadira Croes, e maximo anotador di campeonato, ta logra su di 15 gol di campeonato ora cu keeper di Arsenal logra saca un tiro lastra pero no por a domina e bala y aki Shadira ta pusha esaki den net pa pone La Fama ariba 3-0.
Cu e score aki tambe e wega a bin termina na fabor di La Fama cu ta sigui riba bon caminda pa alcansa e serie semi final un biaha mas.
E proximo wega di La Fama ta programa pa tuma luga diabierna 6 di april contra di Deportivo Nacional y esaki lo wordo hunga den Compleho Deportivo Frans Figaroa pa 8’or di anochi.
Arsenal ta bolbe mira accion dialuna 19 di maart ora cu nan enfrenta e ekipo di Riverplate den wega cu lo wordo hunga den Centro Deportivo Guillermo Prospero Trinidad pa 8’or di anochi.