Parlamentario pa partido MEP, Sue-Ann Ras den cuadro di nos dia di Himno y Bandera, ta toca e tema di amor pa patria y su nificacion. Segun e Parlamentario, hopi di nos lo puntra: “Kico ta amor pa bo patria?” y algun di nos lo pensa cu, stima bo patria kiermen: ta orguyoso di bo pais, ta orguyoso di bo cultura, bo tradicionnan, bo idioma materno y nacional, bo hendenan y mas. “Mientrastanto otro lo pensa cu, amor pa bo patria kiermen: respeta e simbolonan nacional, canta e himno nacional cu orguyo y adora e bandera como simbolo representativo di nos pais”, e Parlamentario ta sigui bisa.
TELEARUBA
“Mi ta completamente di acuerdo cu tur e formanan aki, cu ta uza pa expresa e amor pa bo patria. Specialmente despues di wak un video di Tele Aruba, unda cu hopi di esunnan entrevista, no tabata sa e letranan corecto, secuencia di e coupletnan, ken a compone nos himno, nificacion di e colornan”, Ras a sigui bisa. Pero segun e Parlamentario, esaki atrobe, mester ta un momento di reflexion pa cada un di nos, pa realmente puntra bo mes, na ki manera abo tambe por demostra bo amor pa bo patria, sin importa si bo a nace of inmigra akinan.
“Mi ta sigur cu nos mester respeta e simbolonan patriotico, nos mester ta orguyoso di unda nos a bin y di tur e tradicionnan, cu ta implica e origen di un cultura asina rico manera den mi caso ta, esun Arubiano”.
COMPORTACION
Sinembargo, segun e Parlamentario, e ta kere cu stima bo patria no ta implica solamente e cumplimento di e accionnan aki, sino un comportacion cu bo pais. “E amor pa bo patria ta manifesta den e manera, cu bo ta dispuesto na haci algun cambio positivo den bo pais. Bo mester kere firmemente y cu conviccion cu bo por haci un cambio pa bo pais, ya sea ta un cambio chikito of uno notabel. Desde e decision di no tira sushi riba caya te na e proposicion pa mehora e sistema educativo di bo pais. Cualkier iniciativa cu ta sugeri un cambio cu un buelta positivo, ta indicacion di amor pa bo patria”.
Ras ta puntra: “Kico ta sirbi canta e himno nacional cu brio y profundidad, si di e otro banda nos ta sobornando un polis pa kita un boet pa exceso di velocidad? Cua ta e meta di zwaai orguyosamente nos bandera nacional, si di e otro banda nos no kier contribui na mehoramento di e sistema di educacion of na e sistema laboral, door di no haci e tarea di cas, drenta les of no bay trabou?”
Crea un patria kiermen construi un pais di persona honesto, trahado y entrega na crecemento di pais y su hendenan. Haci un compromiso cu bo pais, pa realmente bira un miho luga pa biba aden y pa inculca den bo sociedad, un mehoracion constante di bida. Stima bo patria no ta cuestion di djis bisa cu bo ta stim’e, no ta djis di uza e simbolonan, cu ta solamente, un representacion superficial. “Stima bo patria ta un actitud di tuma accion di pro na bo patria, pa actua cu un meta den mente, semper contribuyendo di un manera positivo pa e mehoracion di bo hendenan y di bo pais”, Ras ta finalisa bisando.