Recientemente Bureau Sostenemi y Ministerio di Asunto Social a participa na e Conferencia Internacional Anual cu enfoke riba Maltrato di Mucha y Famia na San Diego, California. E congreso aki ta conoci pa ta un di e eventonan mas grandi y importante den e contexto di negligencia, abuso di mucha y tambe violencia domestico.
Durante e conferencia un cantidad di topico ta wordo trata.
E delegacion di Aruba a atende mas tanto topiconan cu ta relevante y aplicabel pa e situacion local. Topiconan cu a atende tabata por ehempel e proyecto di “Family Justice Centers”, na unda ta trata di atende e problema di violencia domestico, abuso di mucha y abuso sexual den un forma multi disciplinario. Pero tambe a atende seccionnan pa cu e parti di prevencion. Locual cu a resalta ta cu ta di vital importancia pa cuminsa educa e muchanan riba e topico aki ya na un edad hopi trempan como tambe traha cu mayornan dentro di e constelacion familiar.
A rais di esaki, diamars ultimo Darlaine Erasmus Consehero Social di Minister Glenbert Croes conhuntamente cu Daphny Tecklenborg Directora di Bureau Sostenemi a haci un presentacion na tur e instancianan y fundacionnan Social di Aruba pa traspasa tur locual nan a bin cu ne na informacion for di e Congreso..
Trahadornan por a scucha y comparti opinionnan cu otro. Locual tabata notable ta e motivacion di cada trahador pa asina traha hunto pa logra metanan importante pa henter Aruba pa siguridad di nos muchanan.