ORANJESTAD – E conteo pa e di cuatro edishon di e evento di mountainbike ‘12 Hours of Aruba’ a cuminsa. Publico por reserva e fecha aki caba den nan agenda. Participantenan tin un luna pa train y inscribi pa e evento. Organisadornan ta conta cu apoyo di e publico pa bin apoya e coredornan di mountainbike cu ta participando na e careda di Relevo aki.
Meta di e careda aki ta simpel. Teamnan participante mester core mas tanto buelta posibel den 12 hora. E careda ta cuminsa diasabra April 14 pa exactamente 6:00 pm di atardi y lo termina diadomingo April 15 pa exactamente 6:00 am di mainta. Cu esaki e 12 horanan di ciclismo a termina y ta identifica e nomber di e evento, pues ‘12 Hours of Aruba’.
Cada buelta ta di aproximadamente 4 kilometer y ta cuminsa na Kapel di Alto Vista. E ruta ta uno conoci pa mayoria coredornan di mountainbike y cu ta consisti di varios bahada y subinan technico cu biradanan skerpi y complica. Tur menciona ta retonan cu e coredornan lo bay enfrenta. “Un di e retonan mas grandi ta cu di e 12 horanan coriendo, 10 (diez) di nan ta den scuridad. Esaki ta conta pa coredornan cu ta bay participa pa promer biaha, pero tambe pa esnan cu ya den pasado a participa na e careda aki”, segun e organisador Wim Eelens. Eelens ta doño di FX Sports na Noord.
Mas participantenan
E aña aki lo bira e di cuatro edishon di ‘12 Hours of Aruba’. Cada aña mas coredornan ta dicidi di participa. Na 2015 a participa 21 equipo consistiendo di 100 mountainbikers. Na 2016 esaki a crece cu 10 equipo mas, pues 31 equipo cu 134 mountainbikers. Y na 2017 esaki a conta cu 140 mountainbikers y 33 equipo. Esaki ta duna un indicashon cu e evento a bin ta creciendo. Coredornan cu ta participando ta bin di paisnan manera: Curaçao, Venezuela, Colombia, Hulanda, USA y naturalmente Aruba; pues un ambiente ciclistico international.
Categorianan
E participantenan por escoge pa participa e aña aki for di tres categoria. E categorianan ta como lo siguiente: team di duo (homber, muher of mix), team di 4 coredor (homber, muher, mix) of team di 6 coredor (homber, muher, mix). Pa e promer categoria esta duo, e coredornan mester tin e edad di 18+, y e edad di e otro dos categorianan por cuminsa for di 15+.
Mario Nooijen, cu ta forma parti di e organisashon, ta splika con cada equipo mester core den e systema di relevo. “Cada equipo ta reparti e 12 horanan den bueltanan segun nan condishon fisico y rapidez di cada coredor. Durante cada buelta, 1 miembro di equipo lo core 1 of mas buelta; esaki ta desishon di cada coredor/equipo cuanto nan lo core. Na momento cu un coredor disidi cu e kier cambia, esaki lo sosode na final di e buelta den un espacio indica como Seccion di Cambio (wisselvak). Esaki ta e systema di relevo. Ora e cambio tuma lugar e siguiente coredor na su turno lo
bay core mas tanto buelta cu e por pa despues bolbe y hasi e cambio“. Na final di e 12 horanan e team cu a core mas buelta lo resulta ganador absoluto.
Nooijen kier pone enfasis cu ningun coredor lo bay core ruta pa 12 hora su so. “Logicamente cu coredornan cu ta participa den e categoria di duo lo core mas cu e otronan cu ta den e categoria di 6 persona.”
Publico
‘12 Hours of Aruba’ no ta un evento pa mountainbikers so. Publico tambe ta bon bini pa bin wak e evento aki, pa apoya e coredornan. “Bin admira con e cambio den e Seccion di Cambio ta tuma lugar. Un ambiente unico y bon anima. E intercambio di e banchi, cu ta wordo usa pa registra digitalmente despues di cada buelta di cada coredor of equipo ta algo unico pa mira. E espirito di competencia ta masha halto mes durante e 12 horanan aki. Esaki ta e systema di tempo”, Eelens ta splika. Eelens como organisador sa di esaki, mirando e su mes a participa na e evento aki.
Mountainbikers cu no ta participando, pero si kier yuda como voluntario na e evento di ‘12 Hours of Aruba’, por acudi na FX Sports y informa esaki.
Neon
Ta un obligashon cu tur participantenan mester tin luz dilanti y patras riba nan mountainbikes. E aña aki organisadornan lo bay tin un premio especial pa e mountainbike mas bunita drecha cu luznan NEON. E ‘Neon Bais’ mester resalta henter anochi y marduga. “Nos ta conta cu e creatividad di nos participantenan pa decora nan bais. E lo ta algo masha bunita mes pa wak”, Nooijen ta bisa.
Inscribi
Participantenan por inskirbi awor pa e 12 Hours of Aruba na FX Sports na Noord. Akinan lo tin formularionan di inscripshon. FX Sports ta habri dialuna te cu diasabra, 10am te cu 6pm. Formularionan tambe ta disponible riba e website www.12hoursofAruba.com.
Mas informacion ta riba www.12hoursofAruba.com of riba Facebook ‘12 hours of Aruba 2018’. Nos a cuminsa cu e countdown!