E aña aki ya ta 42 aña pasa cu Gobierno Insular a aproba nos himno nacional riba dia 16 di maart 1976. Riba mesun dia a aproba e diseño cu a bira e bandera oficial di Aruba. Dia 18 di maart 1976 Gobierno di Aruba a inaugura e bandera di Aruba y a hisa e bandera di Aruba pa prome biaha pa pueblo di Aruba mira. Tambe a toca e cantica “Aruba Dushi Tera” pa prome biaha como e himno di Aruba. Awor cu mi mes ta forma parti di Parlamento di Aruba, mas ainda mi ta realisa e tarea importante cu parlamentarionan tin y e responsabilidad cu nos ta carga ora di tuma un decision cu ta decisivo pa historia y futuro di nos pais.
Cu e comunicado aki mi kier subraya e balor di un himno y un bandera di un pueblo. Ta pa medio di nos himno y bandera nos ta identifica nos mes como pueblo y como pais. Tin masha tanto ocacion unda nos ta demostra nos bandera y canta nos himno. Pero dia 18 di maart ta un dia special, un dia pa nos reflexiona ariba e echo cu, nos tin un bandera di cua nos por ta orguyoso di dje y nos tin un himno cu ta yena nos curason di emocion cada bes cu nos cant’e.
Tin hopi hende na Aruba cu no sa e trabou y discusionnan pisa cu nos partido MEP lidera pa Betico Croes (dfm) mester a hiba den añanan ’70, pa Aruba por a haya su bandera nacional. E biaha aki mi kier para keto un rato riba algun suceso di e tempo ey. Den añanan ’70 tabata existi un segregracion politico hopi fuerte na Aruba. Betico Croes kier a kibra e barera politico aki y mester a logra trece union entre tur esnan cu ta biba riba e pida baranca aki. Pa e motibo aki el a dicidi di introduci un himno nacional y crea un bandera, cu henter pueblo ta reconoce como un simbolo nacional cu ta representa e pueblo di Aruba. Betico Croes tabata consciente cu pa e logra e Status Aparte tan anhela e mester uni su pueblo pa hunto lucha y logra esaki.
Na aña 1976 partido MEP mester a lucha tanto den Gobierno Insular como den Gobierno Central e tempo ey, pa proclama dia 18 di maart oficialmente como Dia di Himno y Bandera di Aruba. Tanto nos politiconan na Aruba como esnan di Corsou y Islanan Ariba, na prome instante no tabata sostene e lucha di Betico pa separa for di e constelacion Antiano. Prome Minister Juancho Evertsz di Partido Nacional di Corsou e tempo ey a laga sa cu : ‘Cualkier team di futbol di Banda Bou tin un bandera’. Ta Betico Croes a habri e porta pa cada un di e islanan aki tambe por a haya nan propio bandera despues cu Aruba a haya di dje. Ocho (8) aña despues, dia 2 di juli 1984 Corsou a haya su bandera nacional y awor tur e islanan cu tabata forma Antia Hulandes tin nan propio bandera.
Echo ta tambe cu no ta ful Conseho Insular e tempo ey a vota pro nos himno y bandera dia 16 di maart 1976. E fraccion di MEP den su totalidad hunto cu un miembro di PPA a vota pro nos himno y bandera. Tur representante di AVP y demas representantenan di PPA a vota contra e ley aki.
Ta pa e motibonan aki mi kier invita tur hende pa realisa cu no ta sin lucha nos a haya nos propio himno y bandera. Y cu ta pa e motibo aki nos mester ta mas orguyoso ainda di nos himno y bandera. Ta p’esey, nos tur hunto, sin importa di unda bo ta bini, si bo ta biba na Aruba, mi ta invita bo participa na e actividadnan cu ta bay tuma luga rond Aruba. Paricularmente laga nos muchanan cera conoci cu e cultura di Aruba, nos identidad Arubiano. Riba facebook di Departamento di Cultura Aruba (DCA) por tuma nota di tur loke ta bay tuma luga dianan 17 y 18 di maart venidero. Masha pabien Aruba riba nos Dia di Himno y Bandera!