Luna di maart, luna di cultura, luna den cua nos ta celebra nos himno y bandera. E luna cu mas tur esnan cu ta biba na Aruba ta para keto pa reflexiona y ta gradici cu nos tin nos propio identidad.
Diferente Festival a wordo organisa pa duna honor na nos Himno y Bandera. A cuminsa cu e Festival di Canto na Himno y Bandera Infantil y Hubenil. Na unda nos muchanan y hobennan a brinda canticanan hopi bunita y nobo cu palabranan inspirativo cu ta motiva nos mucha y hobennan pa stima nos dushi Aruba.
Festival di canto adulto “Un Canto na Nos Himno y Bandera” a termina diadomingo anochi unda cu 20 cantante a participa cu canticanan dedica di curason na nos pais. Aruba por ta orguyoso di e talentonan musical cu tin aki.
Prome Minister Evelyn Wever-Croes ta gradici tur esnan cu a haci e festivalnan un exito rotundo. N’e cantantenan, musiconan, compositornan, areglistanan, y especialmente e ganadonan, un palabra di felicitacion profundo.