Parlamentario Marlon Sneek Fraccion di AVP a pidi reunion pa Minister bin bisa oficialmente kico e kier cu DPS

Fraccion di AVP a manda pidi Presidente di Parlamento un reunion publico pa atende cu e desaroyo cu tin relaciona cu independisacion di enseñansa, despues di a reuni na varios grupo di maestro y pa cual tabatin hopi interes.
Lider di fraccion di AVP, sr Marlon Sneek ta mustra cu fraccion a dicidi di yama e reunion aki, no solamente a base di e inkietud cu e plan di Minister di Enseñansa pa su maneho cu e kier hiba, pero tambe a base di e hecho cu e mandatario den tur reunion cu grupo di maestronan, e ta duna un version distinto di kico realmente ta su intencion cu independisacion di scolnan publico.
“Nos a sinti caba durante di diferente bishita cu nos a asisti riba e tema aki, caminda a bin dilanti cu e Minister cada biaha, ta cambia su palabranan.
E motibo principal di e reunion cu nos a pidi, ta pa haya for di Minister Rudy Lampe exactamente kico e kier haci y kico ta e version corecto.
Ora nos ta papia di ‘parkeer’ e plan aki, manera nos tur sa ora cu bo parkeer bo auto den un garashi, na ki momento cu ta bo por start auto y sigui core cune.
Nos kier sa kico e minister aki ta compronde bou di paskeer, si e minister aki a compronde e mensahe cu maestronan di scol a manda pa nan, pasobra mester bisa cu siman pasa nos tabatin un reunion na MFA na Noord, cu participacion di maestronan di scolnan di Washington y Kudawecha, caminda a bin cla dilanti cu e maestronan aki, no kier tende nada di independisacion di DPS, pues nos ta spera cu e mensahe aki a yega.
E mesun maestronan aki a duna di conoce cu nan a bay diferente reunion y den cada un di e reunionnan aki, cu e minister tabata presente, e minister a trece un otro version.
Cu otro palabra e minister aki no ta papia berdad cu comunidad y esey ta e conclusion cu nos fraccion por a saca despues di a reuni cu maestronan si scol kendenan a bay e diferente reunionnan aki.
Pa tal motibo pa fraccion di AVP un reunion publico ta importante y mas cu tur cos ta pa nos sa unda tur fraccion ta para pasobra nos ta mira cu tin fraccionnan cu ora nan ta presente den e reunionnan aki hunto cu maestronan di scol, nan ta para un caminda y ora cu nan sali dilanti na otro momentonan, nan ta para otro caminda.
Pa tanto comunidad como maestronan di scol y tur cu ta traha cu DPS, mester tin claridad cla den e asunto aki, ya cu den e reunionnan cu a tuma luga, nan a kier sa sigur di tur fraccion na unda nan ta para den e asunto aki y si nos ta pro of contra.
Manera tur hende sa cu fraccion di AVP den Parlamento tabata e prome cu a sali bisa cu nos ta kere den e rumbo cu e minister aki ta bayendo, mientras cu e otronan a conta cantidad di storia, bira rond, draai rond, dal un keiro cu e maestronan y bisa un tiki di loke nan kier haci.
Pa nos e reunion publico aki ta importante paso e maestronan di scol y Aruba den su totalidad, mayornan kier sa con ta para cu futuro di nan yiunan y nos ta spera cu Presidente por yama e reunion aki pa asina tur hende haya sa kico e kier bay haci.
Nos kier haya sa preto riba blanco kico e kier haci y tambe pa mira su e otro fraccionnan ta para tras di e Minister cu kier parkeer e cambio aki pa despues start sali cune sin mas, y ta algo cu nos kier evita sigur,” Parlamentario Marlon Sneek ta mustra.