Parlamentario Endy Croes a baha fuerte riba Parlamentario Marlon Sneek den su ultimo conferencia di prensa cabando asina cu e credibilidad di Sneek y AVP. Durante e conferencia aki Endy Croes a trece pruebanan palpabel den man pa desenmascara e mentiranan di AVP. Marlon Sneek y AVP tin algun aña ta grita y skirbi tur ora cu AVP a encontra APFA na 2009 cu un dekkingsgraad di bou 60%.
Dekkingsgraad di 74% na 2009
Recientemente fin di siman pasa a bolbe ripiti e storia falso aki. Sinembargo Endy Croes a bin documenta cu un rapport, esta “Annual Stastistical Digest 2016” di Banco Central unda ta reporta tur detaye di actividadnan desde 1986 te cu awor. Riba pagina 2 caba por mira con e werkelijke dekkingsgraad di PVL pensioen landsdienaren tabata. Na aña 2007 esaki a alcansa 98%, mientras cu na 2008 esaki a baha na 68%. Sinembargo na aña 2009 e aña cu Sneek ta referi na dje e dekkingsgraad a subi bek pa 74% den un movecion di recuperacion di acuerdo cu e Plan di gobierno di MEP e tempo aya (mira tabel). Pues nunca pero “HAMAS y NUNCA” esaki a cay bou di 60% manera Marlon Sneek y AVP a pretende den prensa siman pasa y tin añanan ta gritando durante nan conferencia di prensa.
Crisis mundial na 2008
Alaves Parlamentario Croes a splica cu na 2008 tabata tin un crisis mundial unda prijs di crudo a alcansa $147 US dollar pa bari y gobierno e tempo aya a haci tur lo posibel pa absorba e golpinan aki y no traspasa esaki pa pueblo. Tambe Croes a aclaria cu Minister di Finansa di e tempo ey, Sr. Nilo Swaen a pidi Banco Central pa traha un rapport al respecto cual porcierto a keda cla y publica 15 di april 2010, pues hustamente momento cu AVP ta na mando pero awor ta prueba cu Marlon Sneek y AVP no ta tuma nan tempo pa lesa e documentonan aki cual a splica tur cos. Otro advies importante ta e “tripartiet werkgroep” di APFA, Banco Central y Financiën di Aruba kendenan a produci un advies cual a keda publica na December 2009, esta e herziening di pensioenverordening landsdienaren. Esaki tampoco Marlon Sneek no a lesa.
Bisando y pruebando esaki nos ta desenmascara Marlon Sneek y AVP den nan manera anticua di hiba politica, un politica di constantemente lansa calumnia y mentira pa purba score. Ki ora nan lansa un mentira Fraccion di MEP lo sa di reacciona cu e berdad y cu prueba den man, Croes ta finalisa bisando.