Parlamentario Alan Howell Awe tin hopi motibo cardinal cu cu nos mester duna Marisol Lopez-Tromp rason di pakico vota contra e proyecto di Citgo

Parlamentario di POR, Alan Howell, durante conferencia di prensa di e fraccion blauw a elabora riba e tema di e refineria.
El a indica cu contrario na ponencianan presenta door di oposicion, specialmente su colega di fraccion, Marisol Lopez-Tromp a vocifiera for di hopi aña caba e motibonan pa cual e ta contra un refineria. “No ta paso e no kier San Nicolas bon, no ta paso e no kier su pais bon, pero tin diferente motibonan cardinal cu awe nos mester dune rason pakico e tempo ey el a vota contra e proyecto di Citgo”.
Na un forma enfatico Howell a indica cu e ta haye hopi baho di Sr. Dowers pa bay den un rueda di prensa, menciona nomber di fraccion di POR y su integrante bisando cu nan ta contra e proyecto pasobra nan kier ta contra di e proyecto of pasobra nan tin gana di ta contra nan pais.
Parlamentario di POR ta bisa cu Sr. Dowers sa masha bon cu tempo cu e proyecto aki tabata encaminando Sr. Howell mes no tabata ni den Parlamento. Y e motibo specifico pakico e ta halsa su voz pa cu e proyecto aki ta pasobra e ta un representante di pueblo y awor cu tin un Minister President transparente, a logra haya contratonan den man pa por a ‘duik in’ den nan pa sa kico ta come y bebe den e proyecto di e refineria, con e la origina y a base di kico nos ta den e situacion actual.
“Awor por mira den e contractnan y tambe den e Landsverordening cu a wordo traha cu tin yen cos cu no ta cuadra at all, cosnan cu nos ta bisa cu si a traha un mihor contract of a negocia mihor, kisas hasta nos no lo ta den e situacion actual”, Parlamentario Alan Howell a declara.
Un punto cardinal cu no por mira den e contract ta cu semper a papia di 150 miyon Florin si tin un ‘default’, pero den e lease agreement no por mire ningun caminda. E suma aki por wordo mira den e Landsverordening, pero ningun caminda den e contract y pesey Howell a bisa cu el lo haci e pregunta aki na Minister President durante e encuentro cu nan lo tabatin diamars atardi. E ta considera cu esaki lo por pone nos pais den un situacion di desventaha grandi.
Como parlamentario y un yiu di tera cu ta stima su pais, Alan Howell a bisa cu ohala cu e proyecto aki lo por a funciona pa bienestar di San Nicolas y Aruba, pero cu mirando con e cosnan ta bayendo y cu e informacion cu ta hayando por bisa cu ta bayendo di malo pa peor. “Mi ta urgi gobierno pa ta sincero cu pueblo, na ora y na tempo y sali bisa pueblo exactamente con nos ta para pa no haya nos y specialmente trahadornan y famianan, no hayanan cu e sorpresa cu ta bolbe haya nan mes den e situacion cu tempo di Valero”.