Home » Minister Dangui Oduber ta anuncia aplicacion nobo pa por midi e calidad di servicio medico di dokternan di cas.

Minister Dangui Oduber ta anuncia aplicacion nobo pa por midi e calidad di servicio medico di dokternan di cas.

by Admin
0 comment 59 views

Durante conferencia di prensa awe mainta, Minister Dangui Oduber a toca e topico di Salud Publico caminda a elabora ariba e importancia pa cu e mehoracion di cuido medico aki na Aruba. Segun Minister Dangui Oduber, un investigacion a wordo hasi ariba e orarionan cu mas patient ta bishita Spoed Eisende Hulp. E resultado prelimina ta cu e orario cu mas pashent ta bishita Spoed Eisende Hulp ta entre 8or di mainta pa 5or di atardi. Esaki ta justamente e orario cu pashentnan por acudi na nan dokter di cas. Esaki por ta un indicacion cu e dokternan di cas ta menos accesibel y door di esaki e pashentnan ta dicidi di acudi na Spoed Eisende Hulp.

Mundialmente tin 3 indicador pa midi si bo pais tin un bon cuido medico. E tres indicadornan aki ta, calidad di cuido medico, accesibilidad di cuido medico y si e cuido medico ta pagabel. Den e ultimo simannan Minister Dangui Oduber a reuni cu diferente partners den salubridad publico manera AZV, Hospital y IMSAN. Actualmente AZV no ta realmente midi e calidad di servicio cu e huisarts ta duna. Actualmente loke AZV ta midi pa loke ta trata e calidad di servicio medico cu ta wordo duna ta abase di comparacion entre dokternan, un asina yama “Spiegel Meting”. Ta wordo midi cuanto “recept” y “verwijzingen” ta wordo duna por medio di cada dokter. Y asina ta midi e calidad di servicio medico.

Minister Dangui Oduber a anuncia cu esaki lo bai cambia completamente. Minister Dangui Oduber a anuncia cu awor e pashent tin e posibilidad di duna su dokter di cas un score via di un aplicacion (“app”). Pa esnan cu no por hasi uzo di e aplicacion, tin e posibilidad pa hasi uzo di e website. E aplicacion ta bai brinda e pashent e opcion pa por duna su dokter di cas un score a base di diferente indicadornan manera, area di recepcion, e recepcionista/assistant di dokter, facilidadnan, servicio di e dokter, tempo di espera pa wordo atendi, tempo di espera pa por haya un cita cu dokter y tambe e accesibilidad. A base di esaki ta bai realmente midi e calidad di servicio cu ta wordo duna door di e dokter di cas.

Esaki ta algo cu nunca antes a wordo introduci. E proposito di e aplicacion aki ta pa monitor e calidad di servicio di cada dokter y mehora e servicio medico. Na momento cu un dokter su score ta malo, lo bai atende cu e dokter di cas inmediatamente. E mandatario a informa cu e mesun aplicacion aki di score, lo bai wordo aplica pa boticanan, specialistanan y spoed eisende hulp. Tur esaki sigur ta un bon noticia pa tur e pashentnan y aseguradonan pasobra nunca antes a midi e calidad di servicio medico pa asina por trece mehoracion por medio di innovacion y technologia.

 

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio