En conexion cu Dia Internacional di Hende Muhe, e ala femenino di Partido MEP, Forsa Femenino Grace, riba dia di Hende Muhe diahuebs ultimo, a organisa un encuentro hopi ameno na Aruba Surfside Marina. Un di e metanan ta pa aumenta concientisacion bou di hende muhe, y pa esaki cada aña ta organisa un evento riba e dia aki. Pa asina stimula hende muhenan pa sigui bay padilanti.
Riba e anochi aki, candidatonan femenino riba lista di MEP tawata den “spotlight” y a haya e oportunidad pa encontra cu esnan presente un biaha mas na unda nan a presenta un acontesimento cerca di nan curason, of un acontesimento cu a impacta nan bida, un conseho of inspiracion. Representando e ser masculino di Partido, tawata tin Hendrik Tevreden cu a duna un toke diferente e anochi.
E animacion musical pa e anochi a wordo treci pa Francis Jacobs cu canticanan scogi specialmente pa duna reconocimento na e ser femenino.
Na final di e programa, Presidente di Forsa Femenino Grace, sra. Yuyu Croes a entrega un bunita reconocimento na Lider di MEP, pa su logro como e prome Prome Minister femenino di nos pais.
E actividad tawata “Sold Out” di tempran. Y por bisa cu a resulta den un exito rotundo y cada aña ta crece mas den asistencia. Un sala na Aruba Surfside Marina completamente yen.
Presidente di Forsa Femenino Grace, sra. Yuyu Croes, Partido MEP y lider di partido y alabes Prome Minister di nos pais, sra Evelyn Wever-Croes a gradici tur presente pa nan sosten y presencia den e celebracion. Pabien partido MEP y Forsa Femenino Grace cu e celebracion exitoso aki.