FAMIA DI SOLDAT DI SEGUNDO GUERRA MUNDIAL TA TOPA CU DESCENDIENTENAN DI SU BON AMIGO DI ARUBA
BISHITA SPECIAL: NOS HOSPITALIDAD TA TRANSCENDE FRONTERA Y GENERACION
ORANJESTAD – Riba un base diario, e waf crucero di Aruba ta biba momentonan bunita entre esnan cu ta yega di bishita y nos hendenan local. Sinembargo, un encuentro cu a tuma luga recien a capta atencion special. Esey ta danki na e historia cu dos persona ta comparti door di e conexion estableci pa nan antepasadonan. Bob McGoran y famia Viapree a topa, cu cooperacion di Gabinete di Gobernador y Oficina di Turismo Aruba (A.T.A.), pa intercambia storianan cu nan a hereda y cu ta pone cu awe un famia di Escocia na Europa por bisa cu nan tin un lazo cu e isla di Aruba.
Den luna di januari ultimo, Gabinete di Gobernador a ricibi un carta for di Bob McGoran, un ciudadano di Escocia (Reino Uni) den cual e tabata pidi cooperacion pa topa cu descendientenan di Sam Viapree, un persona cu a laga un impresion grandi den e bida di su difunto tata Joseph McGoran. Tabata e deseo di McGoran pa por a gradici personalmente e trato amabel cu a brinda na su tata. Gabinete di Gobernador, na nan turno, a contacta A.T.A. pa honra e peticion extraordinario aki. Asina a logra coordina e encuentro riba tereno di waf caminda Bob McGoran y su casa a yega abordo di e crucero Celebrity Eclipse.
Joseph McGoran tabata staciona na Oranjestad y na San Nicolas, entre augustus 1940 y januari 1942 como miembro di e di 4 Batayon di Cameron Highlanders, un Regimen Scoces di Armada Britanico, cu e mision di proteha e Refinerianan na Aruba despues cu Hulanda a keda invadi door di Alemannan na 1940. Durante e tempo cu el a biba na Aruba, McGoran a cera un amistad fuerte cu e gerente local di e Refineria na San Nicolas yama Sam Viapree. Ora cu e tropanan Mericano a re-emplasa esnan Britanico, Viapree a invita McGoran pa regresa Aruba ora cu guera caba; algo cu e veterano no por a cumpli mas, ya cu lamentablemente el a bira fisicamente incapacita na Italia na 1944.
Na yegada den nos terminal cu e crucero Celebrity Eclipse, e famia McGoran a wordo yama un caluroso bonbini na Aruba door di famia Viapree unda a comparti momentonan bunita. Despues di esaki, Su Excelencia Gobernador Alfonso Boekhoudt a ricibi e famianan na Cas Ceremonial unda hunto cu CEO di A.T.A. Ronella Tjin Asjoe-Croes nan a ricibi un cordial bonbini y a intercambia storianan con e famianan a topa cu otro durante segunda guera mundial, y con esaki a haci un impacto positivo riba e bida di e yiunan di famia McGoran. Specialmente pa e encuentro aki, Gobernador Boekhoudt a presenta un moneda special na Sr & Sra McGoran pa conmemora e momento aki.
Despues di e encuentro ameno a sigui un lunch na West Deck y un Island Tour cu e pareha turista a disfruta enormemente. Sra. Mavis Viapree-Mars y su yiu Sra. Joy Viapree ta recidencia na Aruba. Sra. Mavis, na edad di 97 aña, ta viuda di Bertie y ta conta cu e ta corda Sam Viapree (primo di su difunto casa). E sobrina Joy a splica cu Sam a fayece na Guyana di unda e famia ta bin originalmente y con hopi nan ta aprecia e gesto cu famia McGoran tabatin di busca nan famia y di mantene e memoria di nan omo.
A.T.A. ta sumamente complaci di por a forma parti di e ocasion unico aki fungiendo como facilitador. Un biaha mas e hospitalidad di e Arubiano ta cruza frontera y, den e caso aki, ta pasa tambe di un generacion pa otro. A.T.A. ta comparti e pensamento di Gabinete di Gobernador cu ta resalta e papel importante cu Aruba a hunga den e prestacion di aliadonan durante Segundo Guera Mundial. Aruba tin un historia rico y un reputacion bunita cu cada bes ta bin dilanti den manifestacionnan di persona for di tur skina di mundo. Sigur un tesoro cu nos tur kier cuida y sigui conta, pero tambe cu nos tur kier mantene y fomenta.