Den cuadro di Dia Internacional di Hende Muhe diahuebs 8 di maart, Gobierno di Aruba a organisa un Conferencia pa Hende Muhe den Renaissance Conference Center. Prome Minister Evelyn Wever-Croes ta gradici tur esnan cu a haci e conferencia aki un exito grandi.
Tawata tin un sala yen. E evento tawata practicamento “sold out” ya pa algun dia prome cu e conferencia cual ta mustra e interes grandi cu tin pa atende e tipo di conferencianan aki. E mandatario ta expresa cu ta duel e hopi cu no por a habri mas inscripcion pa tur esnan cu kier a bin pero dado momento mester a cera inscripcion pa tene tur cos bou di control entre otro e gastonan limita. Y ta conseha pa tur hende inscribi na tempo otro aña pa duna nos e oportunidad pa amplia e cantidad.
E mainta di e conferencia tawata inspirativo. E energia tawata enorme di e damanan y e cabayeronan den sala. E charlanan tawata sumamente interesante. Un parti a bay dedica pa enfoca riba e parti social unda expertonan a comparti loke nan ta mira como solucion pa problemanan social. Tambe a toca e tema di e rol di hende muhe den nos comunidad. Innovacion y cambionan cu mester bin. A haya informacion tambe di datonan real cu ainda tin hopi hende muhe cu no ta logra supera posicionnan clave.
Ex premier di Antia Hulandes sra Maria Liberia Peters a duna un discurso hopi inspirativo hibando nos den pasado, trece nos den presente y hiba nos pa futuro. Y tambe el a duna su pensamento di con e ta mira e vision di nos pais pa loke ta trata e cambionan di innovacion.
E mainta a contente tambe aspectonan politico cual a trata di e rol di hende muhe den politica na unda sra Ella Tromp Yarzagaray a duna su bista, su conseho y su ideanan con e ta mira cu goberbacion por yuda trece e cambionan necesario den nos comunidad. Tambe tawata tin un panel politico cu a consisti di Parlamentario Jennifer Reyes, Parlamentario Marisol Lopez-Tromp y Prome Minister Evelyn Wever-Croes caminda nan a comparti experencianan politico di ta hende muhe den politica.
Prome Minister a considera e mainta aki uno hopi inspiriativo cu claramente ta mustra dos cos hopi importante: Hende muhe por logra tur loke cu nan propone nan mes contal cu nos ta uni, pasobra den union nos ta logra tur cos. E di dos cos importante ta cu e hende muhe mester ta e catalisatornan di e cambio. Nos ta influencia e formacion di nos yiunan, nietonan y awo hende muhe ta esnan cu lo percura pa forma e futuro di e pais aki.
Prome Minister Wever-Croes ta gradici tur esnan cu a haci e evento aki asina bunita y inspirativo y ta pidi pa tur hende muhe keda pendiente pa otro aña pasobra e conferencianan aki mester keda tuma luga.