Parlamentarionan Setty Yarzagaray-Christiaans y Rocco Tjon a bishita “Cuerpo Especial Arubano”. E bishita aki tawata den cuadro di preparacion pa trata presupuesto. Manera ta conoci MEP, for di den parlamento, kier hiba un politica proactivo, y pa haci’e posibel pa controla gobierno manera debe ser, mester sa kico e preocupacionnan ta di cada departamento en cuestion.
Durante e bishita a elabora riba e retonan cu CEA ta enfrenta. Falta di personal, e reorganisacion actual y e absentismo halto ta e retonan mas grandi.
E reorganisacion actual ta trece cune un structura nobo di “opleiding” cu ta busca asercamiento qua nivel cerca “opleidingen” di Cuerpo Policial y e Instituto Coreccional. Esaki no solamente lo eleva e calidad di e organisacion pero alavez lo brinda cada trahador un perspectiva di carera mas mihor.
Por ultimo alto mando di CEA a enfatisa cu lo kier explora e posibilidadnan pa innova atravez di tecnologia, pa brinda un mihor servicio na nan clientenan. Esaki entre otro atravez di e lasonan existente cu “Dienst Justitiele Inrichtingen” na Hulanda.