El a pasa bishita tur e companianan subsidiario na MetaCorp
ORANJESTAD, Aruba: Riba Dia Internacional di Hende Muhe, esta 8 di Maart 2018, MetaCorp a dedica e dia special aki na un persona special, na Sra. Clarita Britten. E merdia a cuminsa unda a busca Clarita Britten y su ruman Waika den un limousine y a cuminsa cu e tour cu MetaCorp a prepara pa nan, pa por cera conoci cu tur e entidadnan cu ta resorta bou di MetaCorp.
E prome stop tabata na EcoGas y aki Clarita Britten a mira kico tur nan ta haci. “Mi a pasa dushi. Mi a sinti mi hopi contento di a mira un luga asina moderno y bunita cu hendenan profesional trahando na EcoGas”, asina el a elabora di su bishita. Clarita Britten a keda encanta cu loke el a mira na EcoGas y e tabata desea di keda, pero e mester a sigui cu su tour.
Den un ambiente dushi den e limousine, e di dos stop tabata na ATCO Concrete na Barcadera. Aki e empleadonan femenino tabata warda Clarita Britten yega unda a cumind’e y saca potret cun’e. El a keda sorprendi cu riba dia di hende muhe el a haya oportunidad di mira tanto proyecto bunita y hopi trabou pa hendenan di Aruba haya. Despues di a mira kico tur ATCO tin di ofrece, el a keda masha contento cu e servicio cu nan ta brinda y con lihe nan ta atende cu clientenan.
E di tres stop tabata na Brouwerij Nacional Balashi, unda a haya sa mas con ta produci e cerbes y otro productonan di Tropical Bottling Co. Durante e recorido aki el a haya un splicacion amplio di e proceso y el a keda emociona di tur loke el a mira. E no por a imagina cu na Aruba nos tin un planta asina eficiente, profesional, cumpliendo cu normanan internacional di calidad y perfeccion.
Clarita Britten a pasa e Dia Internacional di Hende Muhe placentero, unda e ultimo stop tabata na The Cinemas na Paseo Herencia. Aki el a disfruta di un dushi combo di popcorn cu refresco y por a mira e sala di pelicula. Aki tambe el a cera conoci cu e plannan di expansion di e compania di cine, cu porcierto ta e prome negoshi di MetaCorp na Aruba desde aña 1920. Awor nan ta na un crusada atrobe pa sigui expande y sigui desaroya den e industria digital, no solamente den calidad di pelicula pero tambe di zonido.
MetaCorp ta existi desde aña 1920 caba den negoshi di cine. Cu apertura di Lago a cuminsa cu E. De Veer Transport cu awendia yama ATCO cu despues a expande tambe den ATCO Concrete Products y Ecotech. Despues di segunda guera mundial a cumpra e planta di Coca Cola y asina a inicia Tropical Bottling, cu na caminda a expande tambe den Brouwerij Nacional Balashi.
MetaCorp ta e empresa comercial mas bieu na Aruba y pronto ta cumpli 100 aña. Cu un fundeshi solido, cu un cultura di compania basa riba principionan di inversionnan duradero y kere den empleadonan, MetaCorp awendia ta cla pa e siguiente 100 añanan di progreso, cu talentonan manera Eddie de Veer, Robert Carrasquero y Guus Slabbekoorn na cabes di e compania.