Home Local Aruba Marriott Care Foundation a participa den Aruba Doet 2018 A renoba...

Aruba Marriott Care Foundation a participa den Aruba Doet 2018 A renoba “Storage Area” na San Pedro de Verona Paviljoen

Banda di un cantidad di otro trabounan mas di embeyecemento

 ORANJESTAD, Aruba: Aruba Marriott Care Foundation a participa atrobe den “Aruba Doet 2018” y e aña aki tabata na San Pedro de Verona (St. Michael Paviljoen). A yuda cu e parti di mantencion na e paviljoen, di cual aña pasa nan a cuminsa cu un proyecto na San Pedro de Verona durante Aruba Doet y awor a finalisa cune.

Militza Gietel, Vice Presidente di Aruba Marriott Care Foundation a remarca cu e aña aki nan a continua cu e proyecto aki di renobacion di un “storage area” na paviljoen. Den e area aki nan ta warda remedi y tur otro artefactonan relaciona cu cuido pa e grandinan. Durante e trabounan, e boluntarionan a kita tur palo cu comehein a daña, nan a verf e luga di nobo, a pone blafon nobo y asina aki duna e luga un cara completamente nobo.

Tambe e boluntarionan a drecha e hardin di e paviljoen, unda nan a haci trabounan di mantencion. E boluntarionan a haci e tereno limpi y a planta matanan nobo, sin lubida e trabounan di verf. Tur esaki tabata pa tene e luga bunita pa asina e grandinan por disfruta di dje.

Aruba Marriott ta parti den 3 hotel y durante e Aruba Doet a conta cu asociadonan di tur 3 propiedad. Militza Gietel a expresa cu nan tin 1200 empleado y a conta cu hopi participacion den e proyecto aki. Tambe Aruba Marriott Foundation Care a join cu e team di benta di Marriott Vacation Club, cual boluntarionan tambe a yuda den e proyecto aki. “Nos tin curason grandi pa nos comunidad y esey ta refleha den e team grandi”.

Marriott Care Foundation ta conta cu sosten di no menos di 650 empleado di e hotel y casino cu tur luna ta contribui den un fondo for di nan salario propio pa haci actividadnan manera esaki. Ta yuda diferente fundacion durante aña. Ta drenta peticionnan y ta evalua cual ta pas bon cu filosofia di e compania. E mesun empleadonan di e hotel a funda Marriott Care Foundation na aña 1999, cu awor ta contribui na comunidad di Aruba pa 19 aña caba. Dunando bek na comunidad ta lanta e sintimento di “Spirit to Serve” den cada empleado cu ta sostene e fundacion door di contribui financieramente y tambe fisicamente.

Aruba Marriott Resort & Stellaris Casino a habri na aña 1995 cu 411 camber. Na aña 1999 a habri Ocean Club cu 311 camber y na aña 2004 a habri Surfclub cu 450 camber. Na tur, e famia di Marriott Aruba ta consisti di mas o menos 1200 empleado den servicio directo y 400 empleado trahando via otro companianan den e compleho di hotelnan. E compleho di Marriott Aruba ta esun di mas grandi den henter Caribe, tanto den cantidad di camber como den cantidad di empleado.