Home Local A.T.A. ACTUALMENTE TA CONDUCIENDO UN ESTUDIO DI ‘CARRYING CAPACITY’ VOCIFERA BO OPINION...

A.T.A. ACTUALMENTE TA CONDUCIENDO UN ESTUDIO DI ‘CARRYING CAPACITY’ VOCIFERA BO OPINION DOOR DI COMPLETA ENCUESTA RIBA 17 Y 18 DI MAART BINIDERO

?????????

Oranjestad – A.T.A. ta kere firmemente den un maneho balansa y ta di opinion cu e necesidad pa berdaderamente enfoca riba un desaroyo turistico duradero a bira mas importante cu nunca. Esaki ta algo integral y no responsabilidad di A.T.A. so: un y tur mester asumi responsabilidad pa esaki pa di e manera aki sigura cu nos pilar economico ta keda uno cu lo sirbi nos tur na un manera desea. Na final di dia, turismo lo keda Aruba su fuente di ingreso principal pa añanan cu ta sigui.

A.T.A. ta facilita diferente proyecto pa stimula accionnan den e direccion necesario. Asina A.T.A. a facilita produccion di e plan pa desaroyo di nos producto turistico ‘Cu Mira pa Futuro’. E plan aki ta disponibel pa un y tur, y ta encurasha pa un y tur uz’e. Por bishita www.cumirapafuturo.com pa mas informacion.

Integral na e plan aki y otro accionnan di A.T.A. ta entre otro proteccion di nos herencianan cultural y natural, salvaguardia nos hospitalidad y stimula e espirito empresarial y di inovacion. Ta para keto na entre otro kico e biahero actual y di futuro ta spera di un vacacion, pero tambe kico nos mes ta desea di nos industria turistico. Turismo ta impacta calidad di bida di nos cada un y nos desaroyo turistico mester bay man den man cu nos desaroyo economico, como tambe ecologico.
Pero central ta, cu mester eleva calidad di nos producto turistico, e parti fisico y tambe e parti humano cu ta nos nivel di servicio. Esaki lo contribui na calidad di e vacacion pa nos bishitantenan desea y lo contribui na un calidad di bida sano pa cada un di nos.

Aruba como destino turistico ta sobresali, mirando cu e ta mantene su posicion como un di e destinacion preferi den Caribe. Desde aña 2011 e prioridadnan strategico di A.T.A. ta enfoca mas riba e calidad di nos bishitante cu ta gasta mas durante nan estadia na Aruba. Pero … atrobe A.T.A. ta subraya e importancia di ‘shift’ nos manera di pensa y di ban guia nos desaroyo den un direccion duradero y di e enfoke grandi cu mester pone riba calidad di nos producto turistico.

Como parti di accionnan, actualmente A.T.A. ta conduciendo un asina yama estudio di ‘Carrying Capacity’.

KICO TA ‘CARRYING CAPACITY’?
Esaki ta un estudio cu ta midi con nos turismo por sigui desaroya mientras cu nos ta salvaguardia y proteha nos medio ambiente y cultura, mantene e calidad di bida y felicidad di nos hendenan como tambe e felicidad di nos bishitantenan pa asina e experiencia cu nos ta brinda na nos turista keda optimal pa nan y nos hendenan. E encuesta menciona anteriormente ta mara na e estudio di ‘Carrying Capacity’.

PAKICO E PLAN CU MIRA PA FUTURO Y OTRO ACCIONNAN RIBA AREA DI DESAROYO DI PRODUCTO TURISTICO TA IMPORTANTE?
Aruba su producto turistico ta uno madura. Aruba no tin mucho espacio pa crece den volumen considerando espacio fisico limita. Pues volumen no lo mira un crecemento manera esaki a mira den añanan nobenta. Mester eleva ingreso pa medio di turismo, y pa esaki mester eleva calidad di producto turistico, teniendo necesidad di nos bishitantenan y comunidad na cuenta. Un estudio di ‘Carrying Capacity’ lo indica cuanto mas por expande den cierto areanan riba nos isla y unda ya no por expande mas y unda kisas si por pensa riba expansion.

PARTICIPA NA E ENCUESTA
Como parti di e estudio Aruba Tourism Authority lo conduci un encuesta cortico bao di nos comunidad.
E ayudo local di nos hendenan ta sumamente importante pa e estudio aki. Pues p’esey ta invita pueblo di Aruba pa yena e encuesta y aporta na e estudio riba dianan 17 y 18 di maart. E team di A.T.A. lo ta na varios parti di Aruba cu un bus. Tur hende cu participa den e encuesta riba dianan 17 y 18 di maart binidero lo ricibi un potret cu ta wordo saca ey mes y lo haya esaki na e mesun momento den un frame diseña pa e dia aki asina conmemora dia 18 di maart, nos Dia di Himno y Bandera. Alabes dianan 26-27-28 di maart lo tin sesionnan pa nos comunidad den diferente bario cual lo cuminisa di 6:30 di anochi. Meta principal di esaki ta pa duna nos comunidad local espacio pa comparti nan opinion.

E encuesta aki un parti cardinal di e estudio y ta spera di por conta riba cooperacion di un y tur.