Home » Si tabatin gañamento riba refineria Marisol y su lider a forma parti grandi di e gañamento aki

Si tabatin gañamento riba refineria Marisol y su lider a forma parti grandi di e gañamento aki

by Admin
0 comment 55 views

Sr Melvin Tromp di partido AVP ta mustra cu ta algo sumamente straño cu algun hende cu ya no ta forma parti di partido AVP mas, tin e curashi di bin dilanti y hunga rolnan cu no ta para nan.
“Ban ta serio si, ya cu ora nos scucha Marisol Lopez Tromp di partido POR papia cu e proyecto di refineria tabata un gañamento pa haya voto, nos ta puntra nos mes ta kico e politico aki ta trata di purba di haci.
Tanto su persona como su lider di partido Oduber, ta dos figura cu a participa den henter e proceso pa haya un compania grandi interesa pa forma parti di e refineria di San Nicolas, cu lo percura pa un empuhe economico y financiero grandi pa nos pais.
Un hende grandi y serio mester ta grandi y serio tambe, sigur ora cu tur hende sa cu Marisol tabata forma parti di partido AVP, tabata Presidente di Parlamento cu sosten di partido AVP y awor diripiente kier hunga rol cu e no sa di tur loke a pasa mientras cu su lider den un reunion publico, a bisa Marisol cu e si ta kere cu desaroyo turistico y refineria ta posibel na San Nicolas ta posibel y factibel pa e area aki.
E solo hecho cu un politico cu e trayecto cu Marisol tin, cu e ta trata di laba man for di tur loke a sosode ora cu el a forma parti di AVP y a sostene gobierno di AVP den henter e proceso pa haya un operador nobo pa e refineria, ta algo increibel cu un hende cu sano huicio lo no guli manda abou.
Desde cu a logra e acuerdo cu CITGO, tur e proceso cu a tuma luga, miyones cu ya caba a drenta caha di gobierno y lo sigui drenta, ta imposibel pa un politico bon na tino bin papia tal disparate ya cu ta cual compania ta bin firma un contract, inverti miyones manera ya caba nan a haci, como parti di un gañamento manera Marisol ta pretende cu esaki ta.
Pa colmo na mes momento cu su persona ta declara na prensa cu henter e proceso di reapertura di refineria ta un gañamento, su lider Oduber a bay sinta saca foto cu director di e compania RdA, cual na nomber di gobierno, ta atende cu tur loke tin di haber cu e refineria, pa supuestamente convence tur hende cu ta awor numa, gobierno ta haya bek pida tereno di e refineria.
Ta cosnan cu ya tin casi dos aña logra caba y cu tanto Marisol como su lider ta bon na altura di dje pues no pa awor pretende di bin hunga rol pa pone otro logra di Gabinete Mike Eman I y II den luz negativo, ta algo realmente increibel.
Di un banda nos por compronde e actuacion aki di Marisol, ya cu su persona como Minister di gobierno di MEP den pasado, a forma parti di un proyecto cu bira conoci como brug di Madushi, cu nunca el a bin dilanti y hustifica e proyecto aki, nunca a duna splicacion y ningun hende a haya sa su pensamento tras di e proyecto aki.
Loke si ta un hecho y pueblo ta mira esaki tur dia cu pasa bay di e gobierno di coalicion di partido POR, ta cu no tin plan di maneho pa papia ariba caminda Marisol a papia di gañamento, a papia di cantidad di cosnan sin base pero nunca a duna declaracion di un solo proyecto cu gobierno cu su lider ta forma parti di dje, ta ehecutando na bienestar di pueblo,” Melvin Tromp di AVP a mustra.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio