Den cuadro di gobernacion y como Minister di Asuntonan General, Prome Minister sra. Evelyn Wever-Croes tin un compromiso pa bishita tur departamento cu ta resorta bou di dje pa cera conoci mas di cerca cu e personal cu ta traha den e departamentonan aki y tambe pa conoce e procesonan di trabou y compronde e circumstancianan bou di cua nan ta trahando. Ta asina mester goberna un pais.
Diabierna, Prome Minister tawata tin e honor di bishita Censo “Bevolking”. Durante e recorido den e departamento, Prome Minister por a mira durante ora di trabou cuanto hende ta wordo atendi na dicho departamento. El a haya un splicacion di e sistema automatisa cu Censo ta traha cu ne. Y tambe el a conbersa cu e trahadonan y a scucha nan inkietud y preocupacionnan.
Censo ta un departamento cu a pasa door di hopi cambio cu a automatisa na un forma hopi innovativo y profesional cu a haci cu e rij di warda ta bira hopi menos.
Simembargo e retonan ta keda grandi. Ta trata aki di un departemento cu ta atende henter nos pais. Pero Prome Minister ta sigur cu e fundeshi ta poni. Censo ta un Departmento hopi ehemplar y por fungi como ehempel pa otro departamentonan. Ta hopi beneficio por saca ora cu innova, automatisa y cambia procesonan den un departamento
Prome Minister ta enfatisa cu esaki ta hustamente locual cu e ta desea di logra den tur departamento cu ta resorta bou di dje. Pa tur automatisa pa corta e tempo di espera pa asina trata cada cliente na un bon forma manera cu tur cliente merece.
Esaki ta un tema cu a wordo discuti hopi y Gobierno di Aruba lo sigui enfatisa e importantcia di esaki y ta dispuesto pa pone fondo disponibel pa mas departamento por innova y digitalisa.
Prome Minister a expresa cu el a sali for di e reunionnan na Censo cu un sentimento hopi positivo y a keda hopi satisfecho cu e recorido y splicacionnan cu el a haya. El a expresa cu el a keda hopi y agradablemente impresiona di e animo y positivismo cu tin y e forma profesional cu Censo a innova y ta considera Censo un ehempel pa otro departamentonan di Gobierno.