Home Police Polis ta detene homber cu tabata den posesion di un arma di...

Polis ta detene homber cu tabata den posesion di un arma di candela

Paradera : Diasabra pa mas o menos 1’or y 55 di marduga varios patruya a bay na e parkeerplaats pariba di Citgo Paradera, despues cu polis a haya un yamada telefonico, bisando cu den Tinashi tin un homber arma y cu e arma di candela lo tawata den su saco di carson patras.

Informacion cu polis a ricibi tawata papia di un homber color cla, cu barba, y tin un t-shirt color preto bisti y un short color di kaki. Na yegada, e agentenan ta topa net banda pabou di e lugar un homber cu ta cuadra cu e descripcion duna. Durante cu polisnan tawata acercando e homber, enberdad nan a nota cu e homber tin algo den su saco di carson patras.
E agentenan na e sitio a dune ordo pa hisa su mannan na halto, e homber a haci esaki. mesora nan a hinca man den saco di e homber y a coy e arma di candela. E homber di inicial F a wordo deteni, ariba violacion di artikel 3 di Vuurwapenverordening y artikel 1 di Wapenverodening.
Despues cu ela keda deteni ela wordo transporta cu transportwagen di polis pa warda di Oranjestad.