E promesa di partido MEP haci na pueblo durante di campaña electoral, a sigura cu dentro di 30 dia nan lo atende y soluciona finansa publico mientras cu ya caba tres bes 30 dia a pasa y no por mira ningun solucion, ni un presupuesto, mucho menos un plan di gobernacion.
Parlamentario pa fraccion di AVP, sr Marlon Sneek ta mustra cu e momento a yega pa Gabinete Wever Croes stop di trata di convence pueblo cu cos ta malo, cu tin un desaster pero tin cosnan ta pasando cu no ta mustra riba ningun desaster.
“A bira un custumber caba for di prome dia cu Gabinete Wever Croes ta papia di desaster cu nan a haya pero sin por mustra algo concreto di loke nan mes ta haciendo of di kico nan ta papiando.
Nos por a mira cu ta papia di un desaster pero tin un minister cu a bin parlamento den menos di 30 dia, pasa man pa 6 miyon florin cu segun su persona renobacion di edificio di gobierno ta prioridad, caminda tur cos ta mustra cu ta drechando espacio pa pone nan hendenan na trabou.
Nos por a scucha un Prome Minister declara cu e no a biaha pa Hulanda of Venezuela pero ta atende asuntonan di nos pais den un forma mas efectivo via medionan electronico, pero di otro banda nos por mira algun di su ministernan den biahenan rond mundo.
Nos por mira un minister di turismo kende a bay keiro na Miami pa ocho dia, gastamento di placa ya cu ta algo cu ATA ta haci, y Minister su presencia no tabata nada urgente.
Otro Minister a biaha pa Barcelona pa atende un convencion di telefon, con serio bo ta?
Otroa bay Colombia pa atende asunto di legalisa marihuana, con serio bo ta?
Nos ta papiando di economia di nos pais y bo ta bin bisa cu ta gastamento di placa pa subi un avion bay Houston y garantisa pa un refineria por bay draai caminda e por garantisa 8 pa 12% di bo GDP, y bo ta bisa cu ta gastamento di placa?
Anto kico e Ministernan cu a bay Spaña, Barcelona, esta Minister Romero, kende a bin bek y bay despues Inglatera, minister di turismo tabata na Miami, pa atende e programa di entregamento di premio y awor e ta na Orlando, pues di kico nos ta papia? Kico nos ta papia di gastamento di placa? Con serio nos ta?
Minister di Enseñansa a bay Colombia pa atende legalisacion di marihuana, esey ta mas importante cu economia di Aruba? Esey ta mas importante pa garantisa trabou pa yiunan di tera?
Pues gobierno su prioridadnan ta completamente bruha, bo no sa mes kico bo ta haciendo manera nos a bisa, incapacidad, esey ta loke e gobierno aki a refleha, incapacidad.
E unico cos cu nos ta mira cu nan por haci bon ta cosnan leuk, parti plakkaat, saca potret, bay baila den carnaval, pero e parti real, e trabou real pa garantisa pa nos yiunan di tera entre otro haya trabou, garantisa cu nos por sigui baha e cifra di desempleo, esey nos no ta mira cu gobierno ta haciendo esfuerso serio pa atende cu e cosnan primordial aki.
Unico cos cu sigur tur dia den medionan di comunicacion, ta persecucion y aki por mustra como ehempel Serlimar caminda minister ta anuncia cu tin hende cu ta contractant, cu hendenan cu mester ta riba caya y no den oficina y a manda e hendenan aki bay traha riba caya pero despues no ta scucha cu ocho hende a kita cay for di shelo den oficina di Serlimar.
Anto ta mesun hendenan aki ta bisa cu Serlimar ta na werki, cu e situacion financiero ta desastroso, y ta cla pa cuminsa bay cobra pueblo pero ta mesun hendenan aki a pasa un mocion pa bisa cu no mag di cobra mas cu 10 florin pa un bari di sushi.
Awe e minister ta bisa cu ta depende cuanto e hende ta gana cu lo tin cu paga 35 florin of 25 mas pero mester cuminsa cobra.
Pakico mester cuminsa cobra, ta pasobra e minister ta hincando hende, e ta dunando hende trabou eynan. Kiermen cos ta dificil pero si tin trahado di su partido eyden. Pues situacion financiero ta na werki pero ta sigui cu e pensamento di kita un pone dos,” Parlamentario Marlon Sneek ta mustra.