De La Sallestraat, Oranjestad; Diadomingo pa mas o menos 7’or y mey, polis, ambulance y brandweer ta wordo manda cu urgencia den De La Sallestraat pa un auto cu a bolter y na prome instancia tabata papia cu lo tin un persona pega den e auto.
Na yegada di e prome patruya nan a bin compronde cu no tin niun persona herida, y cu e chauffeur di e Ford Escape, lo a pega soño tras di stuur, a bay dal contra e drempel cu tin memey caminda y despues di a dal contra un otro auto a bolter.
Den e auto tabata tin tres otro persona mas, cu despues cu e auto a bolter, nan a sali bay for di e sitio. Segun e chauffeur nan tur tres ta bon, nan no ta herida.
Brandweer y ambulance tambe a bay na e sitio, e caminda a keda cera pa trafico te ora cu a logra hala e auto for di caminda.