Calabas: Diadomingo pa mas o menos 1’or di marduga ta drenta un informacion cu lo tin un dama di edad, canando riba caminda di Calabas pa Kudawecha pariba di e bocht di Moko.
Na yegada e patruya ta bin topa cu algun persona cu ta splicanan cu nan a mira e anciana ta canando canto di caminda y pa un of otro motibo a cay canto di caminda, mesora e personanan atento aki a core lanta e dama y a yama polis, esnan cu ta biba eybanda mesora a reconoce e señora y a bay yama su yiu pa bin buske, ta trata di un dama di aparentemente 87 aña, cu lo a bruha y a sali den e oranan di marduga for di cas cana bay direccion pariba.
E dama a duna polis su nomber y su fam, ela bisa polis cu e no sa kiko a pasa cu ne si ta un hende lo a pushe, pero probablemente e biento fuerte lo por a pone perde balans y cay.
Algun miembro di famia di e dama a yega na e sitio y despues cu polis a tuma tur datos, un miembro di famia a bay cu e dama bek su cas.
Danki na e personanan atento cu na e momento ey tabata pasando riba e caminda aki, cu a mira e anciana y a sali mesora na yude, cu tabata tin un bon final. E ta peligroso pa un un señora di edad cana den e oranan di marduga aki canto di caminda, paso autonan ta core cu velocidad halto riba e caminda aki y e dama no ta cana mucho bon. Tambe hende di mal intencion por a hacie un daño tambe.