Home Politics Prome Minister Evelyn Wever-Croes: EX PREMIER DI ANTIAS HULANDES SRA MARIA LIBERIA...

Prome Minister Evelyn Wever-Croes: EX PREMIER DI ANTIAS HULANDES SRA MARIA LIBERIA PETERS A ENTREGA UN BUKI NA PROME MINISTER

Ex Premier di Antias Hulandes, Sra Maria Liberia Peters tawata orador special na e Conferencia pa Hende Muhe “Briya den bo sapato, cana pa Progreso.” Sra Liberia Peters a duna un tremendo discurso lagando atras conseho y encurashamentonan pa tur esnan presente.

Na final di un discurso hopi inspirativo, e Ex-Premier a entrega un buki na nos Prome Minister Sra. Evelyn Wever-Croes. “Politiek heeft een Prijs” ta e nomber di e buki. Sra. Liberia Peters a enfatisa cu politiek tin un prijs mientras cu el a dirigi palabranan di encurashamento na Prome Minister.

“Hende ta mira e glamour di e Minister. Pero e prijs cu bo ta paga personalmente y cu bo famia ta paga niun hende ta mira. E momentonan di angustia, di frustracion, di soledad no ta visibel pa pueblo. Pero bo ta haci’e pasobra bo kier aporta”.

Sra. Liberia Peters a menciona di tawata tin e honor di a conoce Sr. Hendrick Croes, tata di Prome Minister kende constantemente tawata menciona nomber di su casa. Esaki segun Sra. Liberia Peters ta un indicacion cla cu nos Prome Minister a lanta den un hogar na unda e rol di hende muhe tawata wordo respeta y reconoci.

Sra Liberira Peters a haci entrega di e buki cu ta un “liber amicorum” cua ta un composicion di experencianan di diferente amistadnan di Sra. Liberia Peters incluyendo Sr. Hendrick Croes.

E Ex-Mandatario di Antias Hulandes a conseha Prome Minister pa cuminsa traha riba su lista di inventario di esnan cu e lo desea pa skirbi nan memorianan den un “liber amicorum” di e prome Prome Minister femenino di nos pais.

Sra. Maria Liberia Peters a termina deseando Prome Minister Evelyn Wever-Croes hopi exito den su trabou como mandatario di nos pais.