Home » Minister mr. Xiomara Ruiz-Maduro riba Dia Internacional di Hende Muher: “NOS HENDE MUHER TA E MOTOR DI CAMBIO DI NOS SOCIEDAD”

Minister mr. Xiomara Ruiz-Maduro riba Dia Internacional di Hende Muher: “NOS HENDE MUHER TA E MOTOR DI CAMBIO DI NOS SOCIEDAD”

by Admin
0 comment 57 views

 

ORANJESTAD – Den un Rennaissance Convention Center completamente yen ayera riba Dia Internacional di Hende Muher, Gobierno di Aruba a organisa un Conferencia di Hende Muher “Briya den bo sapato y cana den progreso”. E conferencia aki a resulta un exito total caminda varios oradornan a trece nan discurso na e publico presente.

 

E mandatario a inicia su discurso expresando palabranan di Pabien na tur hende muher riba Dia Internacional di Hende Muher. E ta un placer y honor pa observa, comparti y celebra e dia special aki cu un sala yena cu hende muher. Hende hombernan lo bisa cu no ta necesario celebra nos dia y lo puntra di biaha ki dia ta nan dia, pero awe nos ta laga nan un banda y nos ta dedica na nos mes, e hende muher cu Dios a brinda hopi don.

Nos ta multifacetico, nos por haci hopi cos parew. Minister Ruiz-Maduro a trece dilanti cu awe e kier a para keto na un Don special cu Dios a bendiciona nos hende muhernan cune, E don di ta motornan di cambio.

 

Den nos bida cotidiano hopi biaha nos lo tende como hende muher, kiko nos ta bay haci awor? Remarcabel ta cu un hende muher hopi biaha no sa puntra su mes e pregunta aki. E ta un pregunta cu hopi biaha ta e hende homber ta haci. Dicon? Pasobra un hende muher no ta perde mucho tempo na cuestiona, nos ta haci, nos ta motornan di nos mesun cambionan.

 

Wak por ehempel ora nos bira malo. Ta nos mes ta nurse, dokter, psicoterapista…. etc. Malo mes nos ta percura pa nos yiunan, pa nos cas, pa nos trabao, pa nos pareha… etc. Siendo cu ora un homber ta malo, ta manera nan ta bisa na Hulandes, nan ta “op sterven na dood”. Nan ta bira mimo, kier pa bo atende nan, no por haci nada… etc. Eynan bo ta waak cu un hende muher, malo mes e ta percura pa cosnan wordo haci.

 

E mandatario a sigui trece dilanti cu e hende muher mayoria biaha ta e motor pa projectonan wordo haci y cambionan bira realidad. Wak rond di bon na trabao, wak rond di bo den bo famia y amistadnan y mira cuanto ta e muhernan cu ta “make things happen”.

Un otro ehempel. Si na bo cas un muraya mester wordo geverf. Tur hende ta pasa banda di dje, pero mayoria biaha ta e hende muher ta esun cu ta cuminsa na bisa cu e muraya mester wordo geverf y ta keda inisisti pa esaki pasa. Tin biaha nan no ta ni bisa nada of zeur, pero e muher mes ta coy kwashi y busca verf y haci e trabao pa asina e trabao wordo haci. Cu otro palabra, ta nos ta esun cu ta start nos motor pa logra e cambionan cu nos kier mira.

 

Si nos wak e arena politico. Di hopi tempo tabata tin e anhelo pa por tin un hende muher na cabes di gobernacion di nos Pais. Y ate, awe nos a conoce e cambio aki danki na un grupo grandi di hende muher cu a sende nan motor y traha pa awe nos por ta bendiciona cu un Minister President Hende Muher. Y mi no ta keda atras, danki na boso motornan mi tambe por ta para boso dilanti como un minister femenino encarga cu e cartera pisa di finanzas publico, economia y cultura. Y keremi cu pa e trabao aki mi motor mester di basta horsepower paso e no ta facil. Mi motor mester traha optimal pa asina mi por pone e finanzas publico, cu ta e motor di e gobernacion di nos Pais, traha debidamente asina e mandatario a sigui trece dilanti.

 

Pero como hende muher mi por haci e trabao aki danki na e motor di hopi otro hende muher. Sigur danki na e motor di mi Mama, cu semper ta brindami conseho y sosten, y kizas awor cu 79 aña di edad e no tin tur e horsepower mas, ma e solo hecho cu e tey y cumi por conta cu e motor di hopi hende muher fuerte den mi famia, amistad, coleganan di trabao y den nos comunidad, nan ta brinda mi motor suficiente forza pa por traha pa logra e cambionan cu nos kier waak na nos Pais.

 

Hopi kizas no ta realisa. Pero ta eynan, den famia, ta e promer caminda cu nos como hende muher mester brinda sosten na otro. Pesey ban hunto duna di nos parti pa sende nos motor y hisa nos horsepower yudando otro hende muher den nos famia pa e por logra e cambionan desea den bida. Sea pa yuda un hende pa cuida su yiunan pa e por traha, pa e por bay scol, pa e por studia, sea ta cambia un shift of val in na trabao. Ban yuda otro logra e cambionan cu nos kier mira den nos bida. Ta un don cu Dios a brinda nos como hende muher, nos ta e motornan pa logra cambio.

 

Minister Xiomara Ruiz-Maduro ta trece dilanti: “Y lagami bisa algo un rato riba e horsepower di nos motornan. Mi sa cu pa awor algun hende lo pensa, holo un hende muher por wel di ta un motor, pero kizas no cu tanto horsepower. Wel laga mi pone asina. Pa esnan cu tin duda, papia cu cualkier persona cu tabata tin e dicha di duna luz na un yiu, anto el’o bisa bo cu e ta exigi basta horsepower pa carga un yiu 9 luna y pa depues pushe trece na mundo. Pues no tin duda, e hende muher di naturalesa a wordo bendiciona cu un motor cu basta capacidad, ta e confianza nos mester tin den nos mes, pa nos pone e forza aki traha pa nos por logra nos metanan den bida”.

 

Importante ta pa nos como hende muher, forma un union, esey ta brinda cada un di nos e forza cu nos mester pa nos motornan draai mas mihor y cu mas forza. Pesey e ta bunita ora nos por logra nos cambionan individual, pero e ta un bendicion ora cu den union nos por logra e cambionan cu ta beneficia nos tur.

 

Como mandatario femenino di nos Pais, mi no kier baha for di e stage aki sin promer haci un apelacion special na boso tur riba e Dia Internacional di Hende Muher, Mi kier pidi tur e hende muhernan presente y tur esnan cu ta waak mi na tv y cu ta sigui nos via rednan social, pa por conta cu e apoyo di cada un di boso motornan pa asina den union nos logra surpasa e retonan di nos Pais y logra conhuntamente e cambionan positivo cu nos tur merece. Ban briya den nos sapato y mustra cu nos motor a start y cu nos ta determina pa sostene otro hende muhernan den nos comunidad pa nos por logra e progreso tan ahela pa nos dushi Pais Aruba.

 

Na ultimo minister a gradici un y tur cu a participa den e conferencia: “Danki di curason pa boso presencia awe. Y mi ta spera cu mi charla por a start e motor di hopi y hisa e horsepower pa asina hunto nos observa, comparti y celebra nos Dia Internacional di Hende Muher. Masha pabien!”.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio